Gweithgareddau awyr agored â Stad Stagbwll

Cyhoeddwyd:: 23 Hydref 2024

Dyn ar feic mynydd yn reidio drwy goetiroedd godidog gwyrdd — Beicio mynydd drwy’r coetiroedd yn Stagbwll | © National Trust Images / Chris Price

Mae Stad Stagbwll yn lle gwych i ymarfer corff tra’n mwynhau golygfeydd gwych. Beth am fynd i loncian, crwydro mewn caiac neu ddarganfod yr arfordir drwy arfordira? Dysgwch fwy am sut i gymryd rhan ac am aros yn yr ardal naturiol ysblennydd hon ar arfordir Sir Benfro.

Pethau i’w gwneud yn yr awyr agored â Stad Stagbwll  

Cerdded

P’un a ydych chi ar drywydd taith gerdded fer neu rywbeth mwy egnïol, mae milltiroedd o lwybrau cerdded i chi eu mwynhau yn Stagbwll. Mae’r llwybrau’n ymestyn ar hyd yr arfordir, ar lannau’r llynnoedd a thrwy’r coetir, ac mae yma rai llwybrau gwych i’r teulu.

Rhedeg

Barod am her? Rhowch gynnig ar y llwybr chwe milltir sy’n arwain o gwmpas pyllau lili heddychlon, i bentiroedd arfordirol gwyllt ac ar draws traethau euraid.

Galwch yn y dderbynfa yng Nghanolfan Stagbwll i gael rhagor o wybodaeth am ein llwybrau.

Pedwar person yn gorwedd ar y traeth yn cymryd rhan mewn dosbarth ffitrwydd. Mae’n ddiwrnod heulog gydag awyr las ac mae’r môr yn y cefndir yn llonydd. — Grŵp ffitrwydd ar draeth Barafundle, Stagbwll | © National Trust Images/Ben Selway

Caiacio

Caiacio yw un o’r ffyrdd gorau o ddarganfod ein harfordir anhygoel. Gall teuluoedd ddysgu i gaiacio ar y môr o gei cysgodol Stagbwll. Padlwch yn hamddenol i rai o bentiroedd mwyaf dramatig Sir Benfro.

Arfordira

Mae arfordira, camp a ddyfeisiwyd yn Sir Benfro, yn weithgaredd cyffrous sy’n gyfuniad o glogwyn-neidio, dringo clogwyni lefel isel a nofio.

Archebwch sesiwn

Pleser gennym yw gweithio mewn partneriaeth â dau gwmni lleol sy’n darparu gweithgareddau dŵr, arfordirol, awyr agored o ansawdd.

Mae Activity Pembrokeshire yn arbenigo mewn cynnig sesiynau caiacio ac arforgampau o Gei Stagbwll. Am ragor o wybodaeth, ewch i wefan Activity Pembrokeshire ar www.activitypembrokeshire.wales, neu cysylltwch â nhw drwy adventure@activity.cymru neu 07977543396

Mae Outer Reef yn arbenigo mewn cynnig cyrsiau a sesiynau Syrffio a Phadlfyrddio o Freshwater West a Chei Stagbwll. Gellir cysylltu â nhw drwy godi’r ffôn 01646 680070 drwy e-bost contact@outerreefsurfschool.com neu drwy eu gwefan www.outerreefsurfschool.com

Traethau

Mae’r traethau yn Stagbwll yn boblogaidd ar gyfer nofio, syrffio a ffotograffiaeth dŵr bas.

Plentyn yn cydbwyso ar raffau lletgroes, gyda phlant eraill ar raffau llorweddol a boncyffion camu yn y cefndir, Canolfan Dysgu Awyr Agored Stagbwll, Sir Benfro — Plant yn yr ardal chwarae awyr agored yng Nghanolfan Dysgu Awyr Agored Stagbwll, Sir Benfro. | © National Trust Images/John Millar

Canolfan Stagbwll

Dyma’r lle perffaith i fwynhau’r awyr iach fel teulu, wedi’ch amgylchynu gan dwyni tywod, traethau, coetiroedd a llynnoedd. Mae digon yma i lenwi gwyliau cyfan.

Ble i aros

Mae tai bynciau a bythynnod ar gael yn Stagbwll. Os hoffech archebu neu gael rhagor o wybodaeth am Ganolfan Stagbwll, ffoniwch ni ar: 01646 623110 neu e-bostiwch ni stackpoleoutdoorlearning@nationaltrust.org.uk