Darganfod Coed Môr

O dan brysurdeb pont Britannia mae coetir hyfryd ar lannau'r Fenai. Deffrowch eich synhwyrau wrth i chi grwydro ar hyd llwybrau o amgylch Coed Môr.

Gwiwerod Coch

Mae Coed Môr yn gartref i'r wiwer goch prin. Ar adegau prin, cant eu gweld yn y gwyllt. Os ydych chi'n amyneddgar, efallai y gwelwch un naill ai yn y bore neu'n gynnar yn y prynhawn pan fyddan nhw'n fwyaf egnïol. Mae gwiwerod coch yn swil ac yn treulio llawer o amser yn y canopïau. Gwyliwch am farciau crafu ar risglau'r coed a moch coed wedi'u brathu sy'n edrych yn debyg iawn i graidd afal. Yn y gwanwyn cynnar, cadwch lygaid am eu defodau carwriaethol i fyny yn y coed.

Mae gwiwerod coch yn aml yn rhoi genedigaeth rhwng mis Chwefror a mis Ebrill, ac maent yn geni torllwyth arall rhwng mis Mai a mis Mehefin. Yn anffodus, dim ond 20 i 50 y cant o wiwerod coch ifanc sy’n tyfu i fod yn oedolion.

Y Fenai

Mae Glannau Porthaethwy yn Safle o Ddiddordeb Gwyddonol Arbennig Dynodedig. Mae Coed Môr yn rhan o'r ardal hon.

Rhwng Ynys Enlli a Phen y Gogarth, dyma'r glannau creigiog cysgodol mwyaf helaeth. Mae glannau gogleddol y Fenai yn cynnwys rhai o rannau mwyaf diddorol yr ardal cadwraeth forol hynod hon, gyda cherhyntau llanw cyflym ac ychydig iawn o donnau. O ganlyniad, mae’r riffiau sy’n cael eu hysgubo gan y llanw yn gartref i ffawna amrywiol, gan gynnwys sbyngau, anemonïau, chwistrellau môr ac anifeiliaid morol eraill.

Mae'r ardal rhwng pont Britannia a phont Menai yn cael ei adnabod fel Pwll Ceris, a dyma'r rhan fwyaf peryglus yn yr afon. Mae’n nodedig am ei anhawster i fordwyo’n ddiogel oherwydd y trobyllau a’r cerhyntau chwyrlïol sy’n ganlyniad i’r llanw yn golchi o amgylch yr ynysoedd ar hyd y Fenai.

Roedd yr Arglwydd Nelson yn cyfeirio'r Fenai fel un o'r darnau mwyaf peryglus o fôr yn y byd. Yn ôl adroddiadau, dywedodd unwaith- "Derbynnir unrhyw lywiwr a all fordwyo'r Fenai yn fy llynges." Mae cerflun o'r Arglwydd i'w weld ar lannau gogleddol y Fenai.

Gwylio adar

Mae nifer o adar yn galw Coed Môr ac Afon Menai yn gartref gan fod y canopïau yn lleoliadau nythu ardderchog ac mae'r glannau'n darparu toreth o fwyd.

Er eu bod yn anodd eu gweld gan eu bod yn aderyn cymharol swil, gallwch glywed sgrech y coed wrth i chi gerdded o dan y coed. Ym misoedd yr Hydref efallai y gwelwch un yn hedfan i chwilio am fes i fwydo arno.

Mae adar hirgoes fel y crëyr glas, pioden y môr a phibydd coesgoch i'w gweld yn aml yn yr ardal yn chwilota am fwyd.

Yn 2021, roedd angen oedi gwaith ar bont Britannia oherwydd bod hebog tramor yn nythu yn un o’r tyrau!