Pethau i'w gweld a'u gwneud yng Nghregennan
Ewch am dro mewn tirlun hynafol sydd â thystiolaeth o weithgaredd dyn sy'n ymestyn yn ôl dros 4,000 o flynyddoedd. Cewch fwynhau golygfeydd trawiadol, daeareg ddiddorol a bywyd gwyllt sy'n ffynnu.
Hanes difyr
Ers canrifoedd lawer, mae pobl wedi bod gyda chysylltiad â'r tir yma. Mae'n debyg bod y meini hirion a'r carneddi hyn yn dyddio'n ôl i'r Oes Efydd ac mae'r hen gorlannau defaid yn adlewyrchu hanes hir o ffermio sy'n parhau hyd heddiw. Mae yma sawl adfail bach, gan gynnwys Hafoty Fach, man geni i emynydd o'r 18fed ganrif, a oedd yn dwyn yr enw Ioan Rhagfyr.
Golygfeydd godidog
Ar ddiwrnod clir, gallwch fwynhau golygfeydd godidog ar draws afon Mawddach tuag at Abermaw, lle mae ein darn cyntaf o dir, Dinas Oleu, wedi'i leoli ar y pentir uwchlaw'r dref. Gallwch hefyd ddringo Pared y Cefn Hir i fwynhau panorama o olygfeydd mynyddig.
Cylchdaith Cregennan
Mae’r gylchdaith gerdded cymedrol tair milltir a hanner yma yn ffordd wych o ddarganfod daeareg hynod ddiddorol y dirwedd syfrdanol ond garw oddi'ch cwmpas, sy’n gartref i gymysgedd cyfoethog o fywyd gwyllt, hanes a dau lyn sy’n cysgodi islaw crib creigiog Pared y Cefn Hir.
Mae opsiwn hefyd ar hyd y daith i dorri'n ôl i wneud cylchdaith fyrrach a haws o un milltir a hanner.
Dau lyn arbennig
Rhoddwyd y ddau lyn a'r tir cyfagos i'n gofal ym 1959 gan yr Uwchgapten C. L. Lynne-Jones, er cof am ei ddau fab a gollwyd yn yr Ail Ryfel Byd.
Mae ansawdd y dŵr yn y llynnoedd yn eithriadol o dda. Mae modd gweld i lawr i ddyfnderoedd o 8 metr, sy'n golygu eu bod ymhlith yr enghreifftiau gorau o lynnoedd ucheldir sy'n isel mewn maetholion (oligoroffig) yng Nghymru. Maent yn gartref i amrywiaeth o blanhigion ac inferrtebratau, sy'n cynnal llawer o rywogaethau fel madfallod dŵr palfog sy'n bridio a gwenoliaid prin.
Am ymholiadau pysgota ar y llynnoedd, cysylltwch gyda Pysgodfa Llynnoedd Cregennan os gwelwch yn dda ar 01341 250426.
Helpwch ni i amddiffyn y llynnoedd
Gofynnwn yn garedig i bobl beidio â nofio, caiacio, padlfyrddio, na chaniatáu i gŵn fynd i mewn i'r llynnoedd. Mae hyn yn helpu i leihau'r risg o gyflwyno rhywogaethau goresgynnol o ddyfroedd cyfagos a llygryddion o driniaethau cŵn ac eli haul.