Ein coedlan goffa yn Erddig

Rydym yn falch o gael ein dewis fel lleoliad ar gyfer un o goedlannau coffa tri newydd Cymru a fydd yn gofeb fyw i’r rhai a gollodd eu bywydau yn ystod y Pandemig Covid-19. 

Mae Coedlan Goffa Hafod y Bwch yn rhan o Raglen Coedwig Genedlaethol Llywodraeth Cymru, lle i gofio a myfyrio, ynghyd â chynnig man gwyrdd ar gyfer y dyfodol i bawb gael budd ohono.   

Yn cynnwys naw hectar ar ochr ddeheuol ystâd Erddig, mae’r coetir diogel a hygyrch hwn yn gwahodd ymwelwyr i anrhydeddu anwyliaid a chysylltu â natur mewn amgylchedd heddychlon. 

Coedlan i’w chofio

Mae’r coetir yn sefyll fel man i gofio, myfyrio a chysylltu â’r byd naturiol yn barhaus. Gyda’i thema ‘gwydnwch’ – teyrnged i’r cryfder a ddangoswyd gan bobl Cymru, mae’n gweithredu nid yn unig fel cofeb ond hefyd fel symbol o obaith ac adnewyddiad. 

Bydd y coetir yn chwarae rhan hanfodol yn y broses o gefnogi adferiad natur a brwydro yn erbyn yr argyfwng hinsawdd. Nawr yn agored i’r cyhoedd, mae’n gwahodd pawb i ddod ynghyd, i fwynhau ei harddwch ac i fod yn dyst i’w dwf am genedlaethau i ddod.  

Creu coetir: Ein dyluniad

Cafodd dyluniad y coetir ei siapio gan fewnbwn cymunedol, gyda’r nod o greu lle ar gyfer pobl a natur. Yn dilyn sesiynau ymgysylltu cymunedol a mewnbwn gan randdeiliaid, daeth nifer o ofynion allweddol i’r amlwg, gan arwain y broses o greu gwahanol ardaloedd, pob un â’i ffocws penodol ei hun: 

Lle i bobl

• Mae mynedfa groesawgar i’r coetir, sy’n llawn planhigion, yn cysylltu pobl â’r maes parcio cyfredol ac yn darparu gwybodaeth i bobl gynllunio eu hymweliad.  

• Yng nghanol y coetir, mae dôl fawr o laswelltir yn darparu ardal gymdeithasol awyr agored ar gyfer cael picnic, digwyddiadau a gweithgareddau. Yn ystod misoedd yr haf mae’r llwybrau’n creu profiad trochol i ymwelwyr wrth i’r blodau gwyllt flodeuo.  

• Anogir pobl i grwydro drwy fyd natur mewn ardal chwarae naturiol ar gwr y safle.  

• Mae man cymunedol parhaol yno sy’n cynnwys perllan yn llawn coed ffrwythau, y disgwylir iddynt  flodeuo yn y gwanwyn a chynnig ffrwythau i’w casglu yn yr hydref.  

• Ar gyfer y rheiny sy’n chwilio am funud o heddwch, mae ardal dawel arbennig yn rhoi lle i feddwl gyda nodwedd ddŵr yn ganolog iddo.  

• Mae llwybrau gwastad, llydan a hygyrch sy’n addas ar gyfer cadeiriau olwyn, sgwteri symudedd a bygis yn cysylltu’r gwahanol ardaloedd. Mae’r llwybrau sy’n bodoli eisoes yn cynnig mwy o fynediad ar droedm gan alluogi pobl i archwilio’r cefn gwlad o’u cwmpas.   

• Mae meinciau lliwgar sy’n adlewyrchu’r planhigion lleol yn rhoi mannau croesawgar i eistedd ac ymlacio.  

• Mae rheseli beic ar gael i feicwyr wrth y brif fynedfa.