Volunteer with us
Search for live volunteering opportunities, or register your interest with St David's.
Gwirfoddoli yn ein lleoedd gwledig yng ngogledd Sir Benfro
- Cyhoeddwyd:
- 08 Rhagfyr 2023
Ymunwch â’n tîm o geidwaid gwirfoddol yng ngogledd Sir Benfro. Mae gwirfoddoli’n ffordd wych o ddysgu sgiliau newydd, gwneud cyfeillion newydd ac ymestyn eich gorwelion.
Gwirfoddoli wrth yr arfordir ac yng nghefn gwlad
Mae ein ceidwaid gwirfoddol arfordirol a chefn gwlad yn hynod bwysig yma yn Sir Benfro gan eu bod yn helpu ein tîm o geidwaid i ofalu am ein lleoedd a chyfrannu at ein nodau cadwraethol.
O blannu coed ifanc a mes ar ddiwedd tymor yr Hydref, i ledaenu gwair gwyrdd ar ddiwedd misoedd yr haf, cael a chael gwared ar hen ffensys yng nghanol y mwd a thocio llwyni, mae gwirfoddoli gyda ni yng nghefn gwlad yn ffordd wych o ymdrochi ym myd natur.
Drwy gymryd rhan, gallech…
• Dreulio amser yn yr awyr agored yn nhirweddau gwledig hyfryd Sir Benfro
• Gweithio gyda’n ceidwaid cefn gwlad gwybodus
• Cyfrannu at yr ymdrech i liniaru’r newid yn yr hinsawdd
• Bod yn rhan o dîm amrywiol a brwdfrydig a ffurfio cyfeillgarwch newydd wrth weithio ar brosiectau cadwraethol pwysig yn Sir Benfro
• Ennill profiad drwy gymryd rhan mewn arolygon bywyd gwyllt a phlanhigion
• Datblygu a rhannu eich gwybodaeth am natur a sgiliau cefn gwlad traddodiadol
Hefyd, byddech yn ymuno â’r elusen gadwraeth fwyaf yn Ewrop ynghyd â thîm ehangach yr Ymddiriedolaeth Genedlaethol sy’n ymfalchïo mewn gofalu am 780 milltir o’r arfordir, dros 250,000 hectar o dir a thros 500 o dai hanesyddol, cestyll, henebion, gerddi, parciau a gwarchodfeydd natur (gan gynnwys goleudai, pentrefi, tafarndai a mwynglawdd aur!).
Rydym yn elusen unigryw sy’n croesawu miliynau o bobl bob blwyddyn. Ein gweledigaeth yw agor mannau er budd pawb, am byth.
Beth yw natur y gwaith?
Bod yn weithredol
Mae ein rolau gwirfoddoli awyr agored yn amrywiol, a gallwch ymgymryd â thasgau fel plannu coetiroedd, cynnal ffensys a llwybrau, yn ogystal â mynd i’r afael â rhywogaethau ymledol neu reoli rhedyn a chodi sbwriel wrth yr arfordir.
Monitro bywyd gwyllt
Rydym yn ymgymryd â llu o fio-arolygon, o gyfrif gloÿnnod byw i flodau gwyllt.
Gall naturiaethwyr amatur ein helpu i wella ein dealltwriaeth o sut mae ein bywyd gwyllt yn newid, a’r ffordd orau o’i ddiogelu. Byddwn yn eich cynorthwyo i ddod o hyd i gynifer o wahanol rywogaethau â phosibl a bydd ein ceidwaid arbenigol wrth law i’ch arwain wrth ichi eu nodi a’u cofnodi.
Teithiau tywys
Gallech fod yn treulio amser yn y coetiroedd, tir a thraethau dan ein gofal drwy gynllunio ac arwain teithiau tywydd o gwmpas ein lleoedd unigryw yma yn Sir Benfro.
Pam ymuno â ni?
Mae llu o resymau dros ymuno â ni; efallai mai gwirfoddoli fydd y penderfyniad gorau a wnewch erioed
• Dewch yn rhan o dîm cyfeillgar ac ymroddedig
• Cewch gyfarfod â phobl o bob cefndir a chreu sawl cyfeillgarwch newydd
• Cewch ddefnyddio eich sgiliau presennol a dysgu sgiliau newydd
• Cewch gryfhau eich CV a helpu i ddatblygu eich gyrfa
• Dewch i fwynhau’r awyr agored anhygoel
• Cewch ddysgu am hanes y lle arbennig hwn
Cysylltu
Os hoffech wneud ymholiadau ynglŷn â gwirfoddoli neu gael rhagor o wybodaeth am rôl benodol, ffoniwch 01646 623110 neu anfonwch e-bost i’r cyfeiriad i ofyn am ffurflen gais. Byddwn yn eich gwahodd i gymryd rhan mewn sgwrs anffurfiol; ac os hoffech ymuno â’n tîm, byddwn yn trefnu sesiwn gynefino.
Fel yn achos pob eiddo sy’n perthyn i’r Ymddiriedolaeth Genedlaethol, byddwn yn talu costau teithio a chewch gyfle i ymuno â’n cymuned o wirfoddolwyr ar-lein.