Diwrnodau allan i'r teulu yng Ngardd Bodnant

Plannu eirlysiau yn ystod gwyliau hanner tymor

Am gyfle i gymryd rhan gyda’ch gilydd mewn gweithgaredd awyr agored yn ystod y gwyliau hanner tymor mis Chwefror, beth am ddod draw i’r Hen Barc i roi help llaw i’r tîm? Does dim angen profiad blaenorol ond byddwch yn barod i fod ychydig yn fwdlyd! 

Ymunwch â thîm yr ardd ar ddydd Mawrth a dydd Iau yn ystod hanner tymor mis Chwefror, i dyfu’r arddangosfa am flynyddoedd i ddod yma yn yr Hen Barc.   

Ymunwch â ni rhwng 11-12.30yp, ar 18, 20, 25 a’r 27 Chwefror pryd gallwch chi helpu’r tîm i blannu fwy o’r blodau bach hyfryd yma i bawb gael eu mwynhau yn y dyfodol. 

Gweld yr eirlysiau yng Ngardd Bodnant  

Ar ddiwedd mis Ionawr ac yn ystod mis Chwefror mae’r eirlysiau'n dechrau dod i’r golwg o amgylch yr ardd, a’u pennau bychain gwynion yn arwydd cyntaf bod y gwanwyn ar fin cyrraedd.

Cerddwch drwy Ardd y Gaeaf a chyfrwch sawl math gwahanol allwch chi ei weld. Wrth ymlwybro drwy’r Hen Barc ac ar hyd Glyn yr Ywen, fe welwch ardaloedd cyfan o’r blodau prydferth hyn a ystyrir yn aml fel yr arwydd cyntaf bod y gwanwyn ar ei ffordd.  

Dewch i ganfod yr ardd gyda’ch gilydd y gaeaf hwn

Gydag aceri o le i grwydro a llosgi egni sbâr, mae gan Ardd Bodnant ddigon i’w gynnig i’r teulu oll gael mwynhau. Gwisgwch yn gynnes, camwch i mewn i’r esgidiau cerdded yna neu eich welis gorau ac ewch ar antur eich hun.  

Oeddech chi’n gwybod bod dros 8 milltir o lwybrau i’w crwydro o gwmpas yr ardd? Hyd yn oed yn ystod y misoedd oeraf, mae yna berlau bach cudd i’w canfod ym mhob cornel. Dim ots faint fydd hyd eich ymweliad, gallwch chi ganfod llwybr newydd i’w fwynhau bob tro.  

Ewch ar antur

Os byddwch chi’n brin o amser, mae yna ddwy daith gerdded gylchol byrrach i’w dilyn o’r Dderbynfa Ymwelwyr. Mae Taith gerdded y rhosyn yn 1.5km o hyd a bydd yn mynd â chi o gwmpas rhannau ffurfiol yr ardd sy’n cynnwys y pum Teras Eidalaidd. Peidiwch ag anghofio cymryd saib ar y Teras Rhosynnau Uchaf, ble byddwch chi’n gweld golygfeydd gogoneddus ar ddiwrnod clir ar draws y dyffryn a thuag at gopaon gwynion Eryri. Mae’r llwybr hwn yn fwy hygyrch i olwynion ac mae’n osgoi unrhyw risiau.  

Mae Taith yr afon ychydig yn hirach ac ar y daith 3km hon, byddwch chi’n mynd ar hyd glan afon Hiraethlyn a thrwy’r ardd goed ryfeddol, ble mae yna lecynnau gwych i’w crwydro a choed hyfryd i’w darganfod - peidiwch ag anghofio edrych i fyny! Pa mor hen ydych chi’n meddwl ydy’r coed talaf? Mae ychydig mwy o lethrau ar y llwybr hwn, ond mae’n dal i osgoi’r grisiau. I gael gwybod mwy am y ddau lwybr, casglwch fap o’r Dderbynfa Ymwelwyr.  

Cynllunio eich ymweliad 

• Mae toiledau a chyfleusterau newid babanod wedi’u lleoli drws nesaf i’r maes parcio, tu ôl i ystafell de’r Pafiliwn ac i lawr ger y Ciosg yn y Glyn.    
• Mae rhai ardaloedd yn yr ardd yn serth ac mae grisiau ar nifer o’r llwybrau. Os byddwch yn defnyddio bygi neu bram yn ystod eich ymweliad, gofynnwch i aelod o’r tîm yn yr Adeilad Croesawu Ymwelwyr pan fyddwch yn cyrraedd am fap sy’n nodi’n glir y llwybrau sydd heb risiau.   
• Mae bocsys cinio i blant ar gael o gaffi’r Pafiliwn a Magnolia.