Diwrnodau i’r teulu yng Ngerddi Dyffryn

Cynllunio eich ymweliad

Dyma’r wybodaeth sydd ei hangen arnoch i’ch helpu i gynllunio diwrnod i’r teulu yng Ngerddi Dyffryn:

• Plant o dan 5 am ddim.
• Mae cyfleusterau newid babanod wedi’u lleoli ar bellter addas o’i gilydd o gwmpas y gerddi, yn ogystal â thai bach hygyrch.
• Mae yna lwybrau sy’n addas i bramiau, cadeiriau olwyn a sgwteri symudedd, a gallwch logi cadeiriau olwyn a sgwter symudedd (am ddim) o’r Ganolfan Groeso.
• Mae gennym ddwy ardal chwarae Pentwr Pren.
• Am resymau diogelwch, ni chaniateir unrhyw fath o feic, sgwter na threic plant yn y gerddi, oni bai bod handlen hir ar y cefn a bod oedolyn yn ei reoli drwy’r amser.
• Mae croeso i gŵn, felly gall cyfaill bach blewog y teulu ymuno hefyd (gwybodaeth yma am ymweld â Gerddi Dyffryn gyda’ch ci).
• Mae’r caffi’n cynnig bocsys bwyd i blant ac amrywiaeth o fwydydd a diodydd poeth ac oer, heb anghofio’r cŵn – mae trîts ar gael iddyn nhw hefyd.
• Mae croeso i chi ddod â phicnic hefyd.

Y Nadolig yng Ngerddi Dyffryn

Mwynhewch hwyl yr ŵyl gyda’r teulu yng Ngerddi Dyffryn y Nadolig hwn. Darganfyddwch olygfeydd hudol yn cuddio yn y gerddi, chwaraewch lwyth o gêmau i'r teulu a thynnwch lun yn sled Siôn Corn neu o flaen y goeden Nadolig anferth. A chofiwch alw yn ein siop lyfrau ail-law lle bydd crefftau Nadoligaidd a digwyddiadau o lawenydd mawr ’mlaen drwy gydol mis Rhagfyr a gwyliau’r Nadolig. Dysgwch fwy yma.

Ymweliadau’r gaeaf

Ydy, mae hi’n aeaf, ond mae’r gerddi yn Nyffryn yn odidog o hyd. Mae digon o natur i’w ddarganfod, gan gynnwys llwyni perddail fel bocyslwyn y Nadolig, y gaeaflys pêr a gwyddfid y gaeaf, yn ogystal â lilis bach gwynion a chrocysau cynnar. Yn ein tŷ gwydr trofannol fe welwch blanhigion diddorol ac egsotig yn blodeuo mewn hafan o liw a chynhesrwydd. Mae ein hardaloedd chwarae, y Pentyrrau Pren, hefyd ar agor drwy’r gaeaf ar gyfer anturiaethau ac adeiladu cuddfannau.

Hanner Tymor Chwefror

O 10-18 Chwefror, dewch â'r teulu ynghyd am gêm o Fingo'r Mis Bach - bach o hwyl yn ystod mis bach! Casglwch daflen bingo am ddim o'r Ganolfan Groeso i geisio dod o hyd i'r holl bethau bach o gwmpas y gerddi. Rydyn ni hefyd wedi cynnwys ambell gêm hwyl fel y gallwch ddysgu am natur yn y gaeaf a chael diwrnod hyfryd i'r teulu hefyd.

Ardal chwarae Pentwr Pren

Mae ddwy ardal chwarae wyllt yn Nyffryn, un y tu allan i’r rhwystr talu ger y ganolfan groeso ac un fwy o lawer yn yr Ardd Goed. Mae digon o le yn yr ardaloedd chwarae gwyllt i’r rhai bach losgi rhywfaint o egni a mwynhau’r mwd.

Ceisiwch gadw eich cydbwysedd ar hyd y coed enfawr a gafodd eu cwympo fel rhan o’r cynllun i adfywio’r ardd goed, sbonciwch o foncyff i foncyff ar hyd y cerrig camu a mwynhewch bicnic ar bonion picnic a gerfiwyd â llaw.

Mae’r ardal yn gartref i wiwerod, adar a llawer o fwystfilod bach, felly dewch â chwyddwydr neu finocwlars i gael golwg graffach.

Pecynnau Synhwyrau ac Antur

Yng Ngerddi Dyffryn mae dau becyn gwahanol ar gael i’w benthyg i'ch helpu chi a’r plantos i archwilio'r gerddi mewn ffyrdd newydd.

Pecynnau Synhwyrau

Mae'r bagiau hyn yn cynnwys amddiffynwyr clustiau i helpu plant sy'n cael trafferthion gyda synau anghyfarwydd neu uchel, llyfr i blant (yn Gymraeg a Saesneg) a all annog amser darllen tawel ynghanol byd natur, cerrig gofid a theganau ffidlan i helpu gyda gorysgogiad a gwella ffocws, a chaleidosgop i greu delweddau gweledol hudol.

Pecynnau Antur

Mae'r bagiau hyn wedi'u hysbrydoli gan y '50 peth i’w gwneud cyn dy fod yn 11¾', gyda chwmpawd i ddod o hyd i'ch ffordd, pêl dennis i fesur cyflymder wrth rolio i lawr bryniau, chwyddwydr i astudio pryfed, binocwlars i wylio adar, a thâp mesur a chyfarwyddiadau ar sut i gyfrifo uchder ac oedran coeden. Mae ’na hefyd daflenni adnabod tymhorol a llyfr natur.

Mae'r pecynnau synhwyrau ac antur yn rhad ac am ddim i unrhyw un eu benthyg, heb fod angen archebu na thalu blaendal (ar gael ar sail y cyntaf i'r felin). Gofynnwch i'r Tîm Croeso am becyn y tro nesaf y byddwch yn ymweld a gwyliwch y plantos yn profi Gerddi Dyffryn mewn ffyrdd newydd a hwyl.

Hyd yn oed rhwng ein digwyddiadau, mae Dyffryn yn opsiwn gwych am ddiwrnod allan i’r teulu. Gyda phob tymor newydd mae’r gerddi’n newid ac yn esblygu, felly mae bob amser rywbeth newydd i’w weld. 

Mae gennym lwybrau tymhorol i chi eu mwynhau hefyd. Casglwch daflen o’r Ganolfan Groeso a fydd yn eich tywys at uchafbwyntiau tymhorol y gerddi. Gweler y dudalen Y Gerddi yn Nyffryn am ragor o wybodaeth am y llwybr tymhorol sydd ar gael nawr.

A gyda chaffi, siop a siop lyfrau ail-law (gyda dewis gwych o lenyddiaeth i blant ac oedolion ifanc) mae digon i’ch diddanu bob amser yng Ngerddi Dyffryn. Felly pryd bynnag y dewiswch ymweld, gallwch fod yn siŵr y gwnewch chi a’ch teulu atgofion i’w trysori.