Y Pwyllgor - bwrdd cynghori Cymru

Cadeirydd

Jamie Seaton

Mae gan Jamie radd BA mewn Hanes yr Henfyd ac Archaeoleg o Brifysgol Birmingham (1977), a chymhwyster MA llawer mwy diweddar mewn Ysgrifennu Creadigol (Barddoniaeth) o’r Royal Holloway (2019).

Yn 1978 symudodd ef a’i ddarpar wraig, Jessica i Sir Gaerfyrddin.

O 1978 i 1997 dyluniodd ddillad gweu i gwmni a sylfaenwyd gan y cwpwl, a oedd yn gwerthu’n rhyngwladol. Yn 1997 gwnaethant sefydlu’r cwmni dillad a dillad cartref, Toast, lle bu Jamie yn Gyfarwyddwr Dylunio/Creadigol. Gwnaethant werthu'r cwmni yn 2018. Nawr, ymysg pethau eraill, maent yn rhedeg fferm atgynhyrchiol gymysg yn Sir Benfro.

Aelod

Sian Lloyd

Mae Sian Lloyd yn newyddiadurwr ac yn ddarlledwr profiadol, sy’n wyneb cyfarwydd ar ôl cyflwyno rhaglenni cenedlaethol, yn cynnwys BBC Breakfast, BBC Crimewatch Roadshow a Panorama. Mae hi hefyd wedi gohebu ar rai o’r adegau allweddol mewn hanes diweddar, fel uwch ohebydd newyddion ar gyfer y BBC, gan ymddangos yn rheolaidd ar Newyddion 6 o’r gloch a 10 o'r gloch y BBC, yn ogystal â rhaglenni newyddion Radio 4. 

Dechreuodd Sian ei gyrfa Teledu a Radio yng Nghymru fel gohebydd. Yna bu’n gyflwynydd y rhaglen flaenllaw a phoblogaidd y BBC, ‘Wales Today’ a’r rhaglen radio amser gyrru ‘Good Evening Wales.’ Cyn dod yn newyddiadurwr, hyfforddodd Sian fel cyfreithiwr yn Llundain a Hong Kong, ond dilynodd ei breuddwyd o ddod yn newyddiadurwr yn fuan ar ôl cymhwyso.   

Wrth ddod yn llawrydd y llynedd roedd Sian yn awyddus i  feithrin y cysylltiad hwn a sefydlu perthynas gryfach gydag Ymddiriedolaeth Genedlaethol Cymru. Trwy helpu ar Bwyllgor Ymgynghorol Cymru mae hi’n cynnig sgiliau a rhwydweithiau a ddatblygwyd dros yrfa 25 mlynedd o hyd ym maes cyfathrebu a'r sector creadigol, ynghyd ag ymdeimlad cryf o gymuned a gwybodaeth am dirwedd wleidyddol a diwylliannol Cymru.

Aelod

Esther Morris

Mae Esther yn rheolwr partneriaethau a chodi arian profiadol. Ar ôl treulio 10 mlynedd yn gweithio ym maes y Celfyddydau yng Nghymru, mae ei gyrfa hefyd wedi cynnwys rolau yn Llywodraeth Cymru, Coedwigaeth, Peirianneg, ac yn fwyaf diweddar, elusen anabledd yn y DU. Mae hi’n ymddiriedolwr ar gyfer sefydliad celfyddydau cymunedol yn Rhondda Cynon Taf ac yn canu gyda chôr lleisiau merched yng Nghaerdydd. O'r swyddi hyn, mae ganddi rwydwaith cadarn sy’n ei chefnogi’n broffesiynol ac yn bersonol.

Mae Esther wrth ei bodd yn yr awyr agored ac yn frwd dros ddiwylliant, hanes, cydraddoldeb a chynaliadwyedd, sy’n ysgogi ei chyfranogiad a’i brwdfrydedd dros fod yn rhan o’r Pwyllgor. Gyda chysylltiad â Chymru ers 22 mlynedd, gan ddechrau gyda’i hastudiaethau yn Aberystwyth, mae hi wedi ymrwymo i ddiogelu diwylliant, treftadaeth ac amgylchedd naturiol Cymru, a diogelu’r pethau hyn ar gyfer cenedlaethau’r dyfodol.

Mae ei dull strategol, dealltwriaeth am lywodraethu a’i brwdfrydedd dros ddiwylliant yn cyd-fynd â chenhadaeth Ymddiriedolaeth Genedlaethol Cymru. Mae ganddi brofiad o rwydweithio, meithrin partneriaethau a llysgenhadaeth, ar ôl cwlbhau ardystiad Llysgennad Diwylliannol Croeso Cymru, ac mae hi’n dysgu Cymraeg ar hyn o bryd a chafodd bleser o fynychu’r cwrs mynediad am yr ail waith.

Erbyn hyn mae Esther yn byw yn Sir Gaerffili gyda’i gŵr a’i dwy ferch, sy’n efeilliaid.

Aelod

Llinos Evans

Ar ôl cyflawni llwyddiant ym maes y cyfryngau cymdeithasol a marchnata digwyddiadau gyda busnes cychwynnol byd-eang, pontiodd Llinos Evans i swydd a oedd yn prysur dyfu, fel rheolwr cyfathrebu. Yn y swydd hon, rheolodd strategaethau marchnata yn UDA a'r DU, gan oruchwylio marchnata integredig, cyflwyniadau cynnyrch a chynllunio cyfryngau ar draws pob cyfrwng.

Yn 2020, dychwelodd i Gymru, lle cafodd ei magu, ac aeth i’r afael â’r rôl o arwain cyfathrebiadau ar gyfer Traffig Cymru - gwasanaeth gwybodaeth traffig Llywodraeth Cymru. Mae ei swydd gyfredol yn cynnwys sefydlu’r gwasanaeth fel y ‘siop un-stop’ ar gyfer gwybodaeth ddibynadwy, gyflym a dwyieithog am rwydwaith ffyrdd strategol Cymru.

Mae’r rhwydwaith hwn yn ased hanfodol sy’n cysylltu pobl â lleoedd ledled Cymru. Mae ei brwdfrydedd dros gysylltu pobl â lleoedd yn ysgogi ei brwdfrydedd i ymuno â’r Pwyllgor. Mae hi’n grediniol y bydd gwaith YG Cymru i ddiogelu amgylchedd a threftadaeth ddiwylliannol Cymru yn creu effaith barhaol ar gyfer y wlad hon, heddiw ac ar gyfer cenedlaethau’r dyfodol.

Aelod

Joe Wilkins

Mae Joe yn ecolegydd ac yn ymgyrchydd Hawliau Natur o Gymru gyda chefndir mewn ecoleg a bioleg amgylcheddol, a brwdfrydedd dros gynhwysiant, eglurder a thegwch ehangach yng nghyd-destun llywodraethu amgylcheddol a chadwraethol. Yn ddiweddar, enillodd Wobr Green Heart Hero, gwobrau hinsawdd a chynaliadwyedd mwyaf blaenllaw yn y DU, am ei waith yn denu diddordeb rhanddeiliaid yng Nghymru mewn trafodaethau ynghylch adferiad natur. Yn siarad Cymraeg fel mamiaith ac yn falch o fod yn hanu o Geredigion, mae’n mwynhau archwilio’r cysylltiadau rhwng diwylliant lleol a natur ac ni fydd byth yn gwrthod stori dros baned. Un o'i brif resymau dros ymuno â’r Pwyllgor yw er mwyn egluro sut yr ydym yn cysylltu’n well â natur fel rhanddeiliaid ac fel rhan o’n cymunedau a’n diwylliant. Pan nad yw’n cael paned wrth ei ddesg, gallwch ei weld yn agos at ddŵr, neu yn y dŵr, lle mae’n teimlo fwyaf cartrefol.

Mae Joe yn gweithio fel Swyddog Ymgysylltu Cymunedol Ceredigion i Ymddiriedolaeth Afonydd Gorllewin Cymru, yn gweithio i gefnogi a grymuso gweithredu cymunedol dros afonydd yn y sir sy’n gartref iddo. Mae hefyd yn gweithio fel ymgynghorydd llawrydd ar nifer o brosiectau yn ei famwlad, Cymru, ac yn rhyngwladol. Yn ogystal â’i waith, mae Joe yn gwasanaethu fel Is-lywydd Bwrdd Reserva: The Youth Land Trust, yn aelod o Gyngor Cymru ar gyfer Dysgu yn yr Awyr Agored a Bwrdd Ymddiriedolwyr Theatr Byd Bach, yn ogystal â Chydlynydd Cymru ar gyfer UK Youth for Nature. Yn flaenorol, gwasanaethodd ar Gyngor Ymgynghori Ieuenctid Diwrnod Cefnforoedd y Byd, y Stockholm+50 Youth Task Force-, ac fel cynrychiolydd ieuenctid i bumed Cynulliad Amgylchedd y Cenhedloedd Unedig a Chynhadledd Fioamrywiaeth y Cenhedloedd Unedig (COP15) yng Nghanada.