Y Prosiect

Grant Buddsoddi mewn Coetiroedd (TWIG)

Mae'r prosiect yn cael ei ariannu gan y Grant Buddsoddi mewn Coetir (TWIG), cynllun grant sy'n darparu cyllid i greu, adfer a gwella coetiroedd. Mae’n rhan o’r rhaglen Coedwig Cenedlaethol i Gymru. Mae'n cael ei ariannu ar y cyd rhwng Llywodraeth Cymru a'r Cronfa Treftadaeth y Loteri Genedlaethol.

Y bwriad

Ein gweledigaeth yw coedlannau hygyrch iach sydd wrth galon bywyd cymunedol.

Un nod allweddol yw darparu mynediad i fyd natur a bydd y prosiect yn agor tair coedlan sydd yn anhygyrch yn bresennol ar ystâd Ysbyty i'r gymuned leol eu mwynhau.

Y Coedlannau

Mae'r prosiect yn ffocysu ar dair coedlan:

• Coed Blaen y Coed;

• Coed Hafod Las;

• a Coed Gwernouau.

Gwella mynediad i'r gymuned leol

Mae cysylltiad â'r awyr agored yn hanfodol i helpu pobl i fyw bywydau mwy iach a darparu ffyrdd newydd o gysylltu â natur. Ar hyn o bryd mae mynediad i'r coedlannau yn wael, ond bydd y prosiect yma'n helpu i ddod â'r coedlannau yma o dan reolaeth hirdymor ffafriol a byddem yn gallu cyflawni ein hamcanion ar gyfer iechyd y coedlannau a'r cymunedau y maent yn bodoli ynddynt.

Beth sydd yn mynd i ddigwydd?

Trwy weithio gyda'r gymuned, bydd gofodau ar gyfer hamdden, myfyrio a dysgu yn cael eu creu yn ogystal â thaith gerdded treftadaeth leol newydd - yn cysylltu'r ddwy ochr o bentref Ysbyty Ifan.

Bydd y prosiect hefyd yn creu mwy o gyfleoedd i gynnwys pobl yn ein gwaith cadwraeth, i adeiladu a chryfhau cysylltiadau â’r coedlannau ac i gynyddu dealltwriaeth o’n treftadaeth naturiol werthfawr a sut i’w adfer.

Gwella bioamrywiaeth ar gyfer natur a phobl

Mae gwella mynediad i'r coedlannau yma'n gyfle hefyd i ni wella bioamrywiaeth - a fydd yn gwella'r profiad i bobl gysylltu â natur.

Mae adfer Planhigfeydd ar Safleoedd Coetir Hynafol (PAWS) yn llydanddail yn dod â buddion amgylcheddol cysylltiedig ar gyfer cynefinoedd, bioamrywiaeth, ansawdd pridd a dŵr – gan greu tirwedd fwy gwydn ac iach.

Bydd rhywogaethau allweddol fel barcudiaid coch, bele’r coed, adar coetir prin fel y gwybedog brith, tingoch a thelor y coed, cennau coedwigoedd law a bryoffytau yn ffynnu a bydd mwy o bobl yn defnyddio’r coetiroedd ar gyfer hamdden.

Bydd y gymuned leol yn chwarae rhan allweddol wrth blannu coed newydd ar y safleoedd.

Beth sydd wedi digwydd hyd yma

Ym mis Mehefin 2024 roedd Ymddiriedolaeth Genedlaethol Cymru yn llwyddiannus yn eu cais am gyllid TWIG i wella mynediad i dri choetir ar Ystâd Ysbyty Ifan. Penodwyd ceidwad prosiect TWIG yn fuan a dechreuodd y gwaith yn ystod yr haf i baratoi traciau a dechrau cael gwared ar goed conwydd yng Nghoed Gwernoau a Choed Hafod Las i baratoi ar gyfer plannu coed llydanddail gyda’r gymuned leol. Bydd y traciau'n cael eu hymestyn a'u hail-wynebu unwaith y bydd y gwaith cwympo wedi'i gwblhau er mwyn galluogi mynediad gwell i'r cyhoedd.

Gweler yr amserlen isod am ragor o fanylion...