Hedfan dronau yn ein lleoliadau

Aelodau neu’r cyhoedd yn hedfan dronau

Nid ydym yn rhoi caniatâd i hedfan preifat oddi ar ein tir a’n heiddo am y rhesymau canlynol:

• Mae ein haelodau a’n hymwelwyr yn gwerthfawrogi heddwch a thawelwch ein lleoedd. Gall presenoldeb dronau amharu ar fwynhad tawel ein lleoedd gan ymwelwyr eraill ac felly mae’n creu risg bosibl o niwsans cyhoeddus.

• Mae gan lawer o’n lleoedd fywyd gwyllt neu anifeiliaid amaethyddol y gellir amharu arnynt, fel adar a gyrroedd o geirw, a allai gael eu dychryn neu ddioddef straen oherwydd presenoldeb dronau, yn arbennig ar amser magu.

• Mae llawer o’n lleoedd yn gartrefi i’n tenantiaid neu deuluoedd hanesyddol. Rydym yn parchu ac yn gwerthfawrogi eu preifatrwydd a byddai defnyddio dronau yn amharu ar y preifatrwydd hwnnw.

• Mae gan y rhan fwyaf o dronau gamerâu ynghlwm wrthynt a byddai eu defnyddio yn groes i reolau’r Ymddiriedolaeth Genedlaethol am ffotograffiaeth a ffilmio masnachol.

• Os bydd drôn yn achosi difrod neu niwed, yn aml nid oes gan beilotiaid sy’n aelodau o’r cyhoedd yr yswiriant cywir, na’r lefel o yswiriant fyddai’n angenrheidiol i roi iawn i’r rhai yr amharwyd arnynt.

• Gall cyfyngiadau gael eu gosod am resymau diogelwch hefyd.

• Rhaid i bob drôn, beth bynnag ei faint na’r gofynion o ran cofrestru, ddilyn Cod Dronau a Modelau o Awyrennau'r Awdurdod Hedfan Sifil Mawrth 2024. Am ragor o wybodaeth, ewch i The Drone and Model Aircraft Code | UK Civil Aviation Authority (caa.co.uk).

Hedfan gan gontractwyr

Mae’r Ymddiriedolaeth Genedlaethol yn defnyddio dronau yn gyson ar gyfer cynnal arolygon ac archwiliadau, arolygon bywyd gwyllt er enghraifft neu archwiliadau to. Comisiynir gwaith o’r fath wrth ymateb i angen penodol ac fe’i gwneir i ni gan gontractwyr proffesiynol a ddewiswyd yn ofalus. Dan yr amgylchiadau hyn gallwn wirio gallu, cymhwyster ac ardystiadau’r contractwr, nodi’r lefel briodol o yswiriant a gosod amodau a rheolaeth briodol ar y gwaith i sicrhau diogelwch y cyhoedd, preifatrwydd preswylwyr ac osgoi amharu ar fywyd gwyllt.

Nid ydym yn ymateb i alwadau gan gontractwyr sy’n ceisio gwerthu gwasanaethau yn gysylltiedig â dronau.

Ffilmio Masnachol

Gallwn roi caniatâd ar gyfer ffilmio masnachol yn gysylltiedig â dronau mewn rhai amgylchiadau. Yn gyffredinol rhaid i’r cwmni cynhyrchu ddilyn yr un rheolau o ran gallu ac yswiriant â’r rhai sy’n ofynnol ar gyfer contractwyr. Yn ychwanegol, rhaid i’r ffilmio fod yn fasnachol ei natur a rhaid cytuno arno gyda’n Swyddfa Ffilmio a Lleoliadau. Bydd ffi lleoliad a ffi prosesu drôn yn berthnasol.

Yn y contract ni ellir defnyddio’r deunydd ond ar gyfer y prosiect a enwyd a gwaherddir defnydd pellach gan gynnwys llyfrgelloedd delweddau.

Ni fyddwn yn rhoi caniatâd i hedfan ar gyfer ffilmio amatur neu gan fyfyrwyr nac yn cymeradwyo ceisiadau gan unrhyw rai sy’n hedfan sy’n ceisio caniatâd yn gyfnewid am fynediad a defnyddio’r ffilm a gynhyrchir.

Er mwyn cael rhagor o wybodaeth am ffilmio yn ein lleoedd, ewch i’n tudalen lleoliadau ffilmio.