Dyddiau i’r Teulu yng Ngardd Goetir Colby

Anturwyr, byddwch yn barod am hanner tymor mis Mai

O 22 Ebrill gallwch fenthyg bag cefn i’ch helpu chi a’ch plantos gael anturiaethau newydd yn y gerddi. Fel opsiwn arall, rhowch gynnig ar ein Llwybr Tu Mewn a Thu Allan o 1 Mai. 

Bagiau Cefn Antur

Mae’r bagiau cefn yma wedi’u hysbrydoli gan ‘50 o bethau i’w gwneud cyn eich bod yn 11 ¾’, gyda chwmpawd i ddod o hyd i’ch ffordd, pêl dennis i fesur cyflymder wrth rolio lawr bryniau, chwyddwydr i weld pryfetach, ysbienddrych i wylio adar a thâp mesur a chyfarwyddiadau ar sut i fesur a chanfod oedran coeden. Maent yn cynnwys taflenni adnabod tymhorol a llyfr natur hefyd.
Mae'r bagiau cefn am ddim i unrhyw un eu benthyg heb fod angen archebu na blaendal (maent ar gael ar sail y cyntaf i’r felin). Gofynnwch i’r Tîm Croeso i gael benthyg bag cefn y tro nesaf y byddwch yn ymweld a chewch weld eich plantos yn profi Coetir Colby mewn ffyrdd hwyliog newydd. Yn digwydd bob dydd o 22 Ebrill tan 2 Tachwedd.

 

Llwybr Tu Mewn a Thu Allan

Mae hwn yn llwybr gwych i’w fwynhau gyda theulu neu ffrindiau ac mae’n rhoi’r cyfle ichi archwilio’r ardd ddyffryn goediog arbennig iawn hon. Llwybr hunan-dywys yw hwn felly dewch unrhyw bryd a chewch gymryd cyn hired ag yr hoffech rhwng yr amseroedd agor a chau. Yn digwydd bob dydd o 1 Mai tan 2 Tachwedd

Uchafbwyntiau Dechrau’r Gwanwyn

Mae digonedd i’w weld ar ddechrau’r gwanwyn yng Ngardd Goetir Colby wrth i’r dirwedd ddechrau dod yn fyw ar gyfer y gwanwyn. Mae egin bach gwyrdd wrthi’n blodeuo i fod yn eirlysiau ar hyd lôn y Cwms, a chyn hir bydd y Camelias yn arddangos eu blodau crand ar odre’r goedwig orllewinol. Cadwch olwg am glychau’r gog yn y llennyrch pan fo rhannu uchaf y coetir yn garped o flodau glas, a’u harogl ysgafn, hyfryd yn yr aer.

Mae hefyd yn adeg dda i fynd i weld ‘llannerch y wybren’ ym mhen uchaf y goedwig, lle gallwch bwyso yn erbyn boncyff a syllu ar y cymylau’n symud ar draws yr awyr.

 

Bachwch siart a phamffled “50 peth i'w gwneud cyn eich bod yn 11 ¾” o’r ganolfan croesawu ymwelwyr pan fyddwch yn cyrraedd, er mwyn rhoi syniad i blant sut i wneud y mwyaf o’r ardd chwarae awyr agored enfawr hon. 

 

Bwyta a Siopa 

Dysgwch fwy yma, neu os yw’r tywydd yn braf, dewch â phicnic a blanced gyda chi i fwynhau pryd gyda’r teulu cyfan yn y ddôl yn rhan isaf yr ardd. 

Os ydych chi awydd siopa, archwiliwch Oriel Grefftwyr Sir Benfro uwchben yr ystafell de yma neu tretiwch eich hun neu ffrind i lawlyfr Colby a llyfr ail-law o'r ganolfan croesawu ymwelwyr. 

Ardaloedd Chwarae Naturiol. 

Gardd y Coetir yw'r lle delfrydol i blant o bob oed ddarganfod natur drwy chwarae. Darganfyddwch y llannerch syllu ar yr awyr ym mhen y goedwig, neu mwynhewch adeiladu ffau dan y coed. Mwynhewch neidio ar y cerrig camu anferth neu archwiliwch y fflora a’r ffawna sy’n ymgartrefu o amgylch y nant sy’n llifo drwy’r ddôl yn rhan isaf yr ardd. 

 

Cynllunio eich ymweliad ar gyfer y teulu. 

 

Dyma ychydig o wybodaeth allweddol i’ch helpu i gynllunio eich diwrnod ymlaen llaw. 

• Mae ein horiau agor ar gael yma. Gwiriwch ein horiau agor cyn teithio, oherwydd gall oriau agor gwahanol rannau o’r ardd newid, yn ddibynnol ar y tymor. 
• Cymerwch ran yn ein digwyddiadau drwy gydol y tymor agored. 
• Mae Ystafell De Bothy yn gweini bwyd ffres blasus.
• Mae croeso ichi ddod â phicnic gyda chi
• Mae ardaloedd chwarae naturiol ar gael. 
• Mae croeso ichi ddod â chŵn gyda chi, ond rhaid ichi gadw cŵn ar dennyn ym mhob rhan o Ardd Goetir Colby. Darllenwch fwy am ymweld â ni gyda’ch cyfaill pedair coes yma
• Mae toiledau ar gael ar yr iard ger y Bothy. Mae cyfleusterau newid babanod ar gael, yn ogystal â chyfleusterau toiled hygyrch. 
• Os ydych chi’n ymweld â ni mewn cadair olwyn neu gyda chadair wthio, mae mynediad gwastad a phwynt gollwng ger y mynediad i gerbydau ar yr iard. Os oes angen cymorth arnoch chi, neu os oes angen rhagor o wybodaeth arnoch chi, gofynnwch i aelod o’n tîm cyfeillgar. Cymerwch gip ar ein map hygyrch yma.