Diwrnodau allan i'r teulu yn Dinefwr

Helfa Wŷ Pasg yn Dinefwr

12 - 21 Ebrill (11yb - 3yp) WEDI YMESTYN - nawr arno tan Ddydd Gwener 25 Ebrill

Mentrwch ar hyd y llwybr gan ddarganfod gweithgareddau i’r teulu cyfan. Dewch draw i fwynhau’r parcdir, y tŷ a’r ardd. Y pris yw £3.50 pob helfa sydd yn cynnwys Taflen Helfa Basg, clustiau cwningen a wŷ siocled gyda llaeth neu un figan Rhydd O*. Mae pris mynediad arferol hefyd yn daladwy (*yn addas ar gyfer rhai sydd ag alergedd i laeth, wyau, glwten, cnau mwnci a chnau coed).  

Eleni dilynwch y llwybr hollol newydd sy’n addas i deuluoedd gyda anturiaethau i’w cwblhau ar hyd y daith. Dawnsiwch fel aderyn, lledaenwch eich adenydd a chwilota am sawl aderyn ar hyd y daith. Mae’r llwybr yn mynd a chi o amgylch y Tŷ Rhew hanesyddol, mewn cylch yn ôl at y tŷ ac yn ôl i’r ardd, a fyddwch chi’n gallu cael gafael ar un o’r hwyaid yn y ffownten? 

Gorymdaith y Gwanwyn

Roedd yn ddathliad arbennig o'r gwanwyn ac yn lansio digwyddiadau'r Pasg yn Dinefwr. Diwrnod ble daeth y gymuned at ei gilydd gan orymdeithio trwy Dinefwr mewn gorymdaith liwgar. Yn arwain roedd Creyr Mawr Gwyn wedi'i gru gan yr artist Ren Wolfe ac deryn anferth yn hedfan uwchben - un oedd wedi'i greu gan bawb mewn gweithdy cymunedol. Yn ddiweddglo i'r cwbl oedd perfformiad arbennig o Mari Ha! gan Osian Meilir a ffrindiau - am ddiweddglo arbennig i'r diwrnod. Diolch i bawb oedd yn ran o Orymdaith y Gwanwyn eleni - roedd yn ddiwrnod arbennig. 

Yr Iard Dderw

Y lle i ddod a dychymyg yn fyw. Ardal sydd wedi’i ddylunio gyda plant mewn golwg, y lle i deuluoedd yn Dinefwr. 

Wrth gamu i fewn i’r cwrt mae’r plant yn heidio am y chwarae dŵr (paciwch y dillad glaw), i chwarae ar yr offeryn cerdd neu i ddefnyddio’r offer sydd wedi’u gwasgaru o gwmpas. 

Mae’n ardal fydd ac elfennau newydd i’w gweld yn ystod y flwyddyn. Gwyliwch mas dros y Pasg a Gwyliau’r Haf – bydd ambell beth newydd yn cael eu cyflwyno!
 

Beth sydd i’w weld yn y Parcdir?

Tu fas mae aceri o barcdir i ddarganfod, perffaith ar gyfer rhedeg, neidio a chwarae. 

A welwch chi’r Gwartheg Gwyn yn y cae o flaen y tŷ? Neu mynd syth am Gastell Dinefwr? Beth bynnag eich dewis mae digon o hwyl i’w gael tu fas yn Dinefwr. 

Yn y Parc Ceirw cewch hyd i’r llwybr bordiau sy’n grêt ar gyfer bygis a’r caffi tecawê sy’n gweini paneidiau neu rhywbeth melys i’w fwynhau ar ôl mynd am dro. 

Ddim yn siŵr ble i gerdded? Bydd ein tîm yn fwy na hapus i’ch helpu i ddarganfod y llwybr gorau i chi, mae hefyd map i’w weld yn y maes parcio. 

Cynllunio eich ymweliad gyda’r teulu

I’ch helpu i gynllunio’ch diwrnod allan ymlaen llaw, dyma ychydig o wybodaeth allweddol:

· Gallwch ddod o hyd i'n holl oriau agor yma ar gyfer gwahanol rannau'r ystâd. Cynghorwn eich bod yn cael golwg ar ein horiau agor cyn i chi deithio oherwydd gall amseroedd agor rhai rhannau newid yn dibynnu ar y tymor.

· Mae croeso i gŵn o gwmpas y rhan fwyaf o'r ystâd ac yn y tŷ a'r caffi. Darllenwch fwy am ymweld gyda’ch ffrind pedair coes yma.

· Gellir dod o hyd i’r toiledau yn y maes parcio ac o fewn islawr Tŷ Newton. Mae'r toiledau anabl a’r cyfleusterau newid yn y maes parcio.

· Gellir gweld prisiau mynediad ar ein tudalen we yma (Gall aelodau'r Ymddiriedolaeth Genedlaethol gael mynediad am ddim).

· Os ydych chi’n ymweld â ni mewn cadair olwyn neu gyda chadair wthio, mae mynediad gwastad o’r maes parcio i Dŷ Newton. Gellir gweld llwybrau hygyrch, gwastad o flaen Tŷ Newton, ond noder y gallai rhai llwybrau fod yn anaddas ac nid oes lifft y tu mewn i’r tŷ. Os oes angen cymorth arnoch chi, neu os oes angen rhagor o wybodaeth arnoch, gofynnwch i aelod o’n tîm cyfeillgar.