Ymweld â Freshwater West a Fferm Gupton

Lle i aros yn Fferm Gupton

Mae Fferm Gupton yn cynnig man gwersylla a chabanau syrffio hunan-arlwyo i’r sawl sydd am aros ychydig yn hirach yn Freshwater West. Mae’n gyfle gwych i weld y lle arbennig hwn mewn golau newydd, mewn lleoliad naturiol.

Porth i’r traeth

Mae Fferm Gupton yn ganolbwynt gwych i ymwelwyr â thraeth Freshwater West.

Mae’r fferm draddodiadol hon yn Sir Benfro wedi’i harallgyfeirio, a dyma bellach eich porth i’r traeth. Mae’r fferm yn cynnwys popeth sydd ei angen i wersylla a llety hunan-arlwyo i grwpiau o hyd at ddeg o bobl yn y caban syrffio.

Mae’r traeth yn wyllt a thywodlyd, ac yn agos at galonnau’r sawl sy’n hoff o natur ac antur. Gwnewch y gorau o’ch ymweliad â’r darn hyfryd hwn o arfordir, neu trowch hi tua’r tir mawr i wylio ein bywyd gwyllt.

Cyfleusterau i ymwelwyr a’r gymuned

Rydym wedi creu canolfan ddehongli i ymwelwyr a’r gymuned leol, sy’n rhannu gwybodaeth am hanes Fferm Gupton a Freshwater West. Mae yma ganolfan gweithgareddau awyr agored hefyd, sydd nawr yn cael ei rhedeg gan Outer Reef Surf School. Gallwch drefnu amrywiaeth o gampau dŵr ar hyd ein harfordir arbennig.

Archebwch sesiwn campau dŵr https://www.outerreefsurfschool.com/

Ffermio er budd natur

Mae gan Fferm Gupton ymagwedd gynaliadwy at ffermio, a ffocws ar gadwraeth.

Mae hyn wedi cynnwys adfer ac ymestyn y cynefinoedd hanesyddol a gweithio gyda natur i addasu i newid arfordirol.

Gwylio bywyd gwyllt yn Freshwater West

Mae system o dwyni tywod naturiol a gwlyptir eang, Cors Castellmartin, yn gefnlen hyfryd i Freshwater West. Mae’r ardal yn cynnwys amrywiaeth o gynefinoedd ac mae’n denu nifer o adar sy’n nythu ar y ddaear.

I’ch helpu i ddod yn nes at natur, rydym wedi agor rhwydwaith o lwybrau sy’n arwain at guddfan adar bren. Cofiwch ddod â'ch binocwlars.

5 aderyn i’w gweld yn ystod eich ymweliad

1. Boda’r Gwerni: Cadwch olwg am yr aderyn hwn yn hedfan dros y gwelyau cyrs. Yn wir, roedd un yma pan roedd ein cuddfan yn cael ei hadeiladu.
2. Telor Cetti: Mae’r aderyn hwn yn nythu ar hyd yr ymylon prysgog yn yr haf a’r gaeaf. Mae’n swil iawn, a phrin y caiff ei weld. Clustfeiniwch am ei gân groch – tsinc-tsinca-tsincatsinc main.
3. Rhegen Ddŵr: Mae’n hawdd clywed yr adar hyn, ond maent yn feistri ar guddio yn y gwelyau cyrs. Clustfeiniwch am eu cri unigryw – mae’n swnio fel moch bach yn gwichian.
4. Crëyr Glas: Gyda’i goesau hirion a’i big, mae’r crëyr glas yn ymwelydd cyffredin â’r gwlyptir. Mae’n bwydo ar famaliaid bach, amffibiaid a physgod. O bryd i’w gilydd mae i’w weld yn ymestyn ei adenydd llydan ac yn hedfan mewn cylchoedd fry uwchben.
5. Llinos: Mae haid fechan i’w gweld yma yn aml, fel arfer yn bwyta hadau o gwmpas Fferm Gupton. Mae eu cân yn soniarus a’u cri hedfan yn drydarol.

Ariannwyd y guddfan adar gan yr ymgyrch arfordirol Neptune, menter a yrrwyd gan unigolion a sefydlwyd dros 50 mlynedd yn ôl i helpu i warchod ein mannau glan môr arbennig. Mae eich cyfraniadau caredig wedi ein galluogi i greu canolfan wych i wylio bywyd gwyllt. Diolch.