Diwrnodau allan i'r teulu yng Nghastell Powis

Dewch i archwilio un o erddi Cymru y gwanwyn hwn

Yn y Gwanwyn, daw gerddi godidog Castell Powis yn fyw. Gyda thywydd cynhesach o fewn cyrraedd, ac wrth inni groesawu’r bywyd gwyllt annwyl yn ôl, cewch weld fflach o liw rownd pob cornel.

Dewch i archwilio gardd deras fyd-enwog wrth i ffefrynnau’r gwanwyn ei hadfywio drachefn. O’r cennin Pedr Cymreig enwog a’r coed blodeuol bendigedig i’r wisteria wych a’r briallu dail crych.

Ymgollwch yn hanesion a harddwch Ystafelloedd Swyddogol y castell hwn, sydd i’w olrhain i’r drydedd ganrif ar ddeg. Mae’r adeilad wedi’i addurno’n goeth gyda phaentiadau, tapestrïau a cherfluniau. Dewch i ddarganfod yr oes o’r blaen, yn ogystal â hanesion am gariad a thrasiedi a thrysorau rhyfeddol o bedwar ban byd.

I’r rhai sy’n hoff o antur, crwydrwch o amgylch y coetiroedd i chwilio am y dreigiau cerfiedig sy’n swatio yn y coed. Bydd y creaduriaid cywrain hyn, sydd wedi’u cerfio o bren, yn siŵr o ychwanegu rhywfaint o hud at eich ymweliad.

A pheidiwch ag anghofio nôl eich Llwybr mewn Bag, sef gweithgaredd awyr agored i bawb o bob oed. Mae’r gweithgaredd hwn yn berffaith i deuluoedd, a bydd yn eich tywys trwy’r gerddi wrth ichi archwilio hanes, natur a thrysorau cudd ystad Castell Powis.

 

Coed blodeuol a blodau

Mae’r cennin Pedr Cymreig enwog yn blodeuo’n gynnar, gan weddnewid y cae a’i droi’n garped melyn trawiadol. Mae’r goeden magnolia wastad yn werth ei gweld, gyda’i blodau pinc a gwyn siâp gobled. Wrth droedio ar hyd yr Adardy, cewch weld y wisteria’n siglo yn y gwynt; ac wrth fynd i mewn i’r Ardd Edwardaidd Ffurfiol, bydd blodau pinc ein coed afalau yn siŵr o’ch cyfareddu.

Plannwyd y coed afalau gan y Fonesig Violet, Iarlles Powis, gannoedd o flynyddoedd yn ôl. Ei chenhadaeth oedd sicrhau y byddai Castell Powis ymhlith y gerddi harddaf – os nad yr harddaf un – yng Nghymru a Lloegr.  Mae Gardd Edwardaidd Violet, lle ceir lawnt groce, borderi blodeuol a choed ffrwythau a gaiff eu tocio’n ofalus, yn un o uchafbwyntiau ein gardd hyd heddiw.

Mae modd gweld coed blodeuol y llain wyllt mor bell yn ôl â’r terasau. Mae blodau gwyn a phinc llachar y coed ceirios a’r magnolia campbellii yn wirioneddol odidog. Wrth i’r petalau syrthio, caiff llawr y goedwig ei drawsnewid yn garped pinc a gwyn.

Mae’r coed afalau yn yr Ardd Ffurfiol yn hen ffefryn ymhlith ein hymwelwyr. Mae’r coed afalau hyn, a blannwyd o boptu’r llwybrau gan y Fonesig Violet gannoedd o flynyddoedd yn ôl, yn dal i ddwyn ffrwyth hyd heddiw. Pan ddaw’r petalau pinc a gwyn i’r golwg, gallwch fod yn siŵr bod y gwanwyn ar ddod.

Dewch i ddathlu yng Nghastell Powis gyda’n bathodyn pin smart sydd ar gael am gyfnod cyfyngedig yn unig. Mae’r bathodyn hwn ar ffurf Clivia miniata, sef planhigyn hynod hardd y gellir ei weld yn blodeuo yn yr Orendy yn ystod misoedd y gwanwyn a’r haf. Enwyd y Clivia ym 1828 gan y botanegydd John Lindley er anrhydedd i Charlotte Percy, Duges Northumberland. Roedd Charlotte yn fotanegydd brwd, a hi oedd y person cyntaf ym Mhrydain a lwyddodd i ddwyn blodau ar blanhigyn Clivia. Mae’r bathodyn unigryw hwn yn ffordd berffaith o gofio eich ymweliad a mynd â darn o hanes botanegol Castell Powys adref gyda chi.

 

Teithiau’r gwanwyn

Mae gennym deithiau cerdded ar gyfer y rhai sy’n dymuno gweld pob dim, neu deithiau eraill ar gyfer teuluoedd â phramiau neu gadeiriau olwyn sy’n awyddus i beidio â chrwydro’n rhy bell. Os na allwch deithio ymhell o gwbl, beth am werthfawrogi’r ardd o’r Cwrt, gan wrando ar yr adar yn canu wrth ichi fwynhau paned o de yng Nghaffi’r Cwrt. Ceir mannau perffaith i gael picnic, ynghyd â meinciau lle gallwch oedi ac edmygu’r harddwch o’ch cwmpas. Peidiwch â cholli’r canlynol:

• Coed afalau a blannwyd o boptu’r llwybrau gannoedd o flynyddoedd yn ôl, gyda blodau mân yn eu haddurno.

• Y terasau – wisteria’n blodeuo ar Deras yr Adardy. Mae’r goeden hon dros 300 o flynyddoedd oed ac mae’n cyfareddu ein hymwelwyr bob blwyddyn – mae’n berffaith ar gyfer grid Instagram. Hefyd, llu o diwlipau amryliw mewn cafnau ar Deras yr Orendy.

• Y llain wyllt – o goed blodeuol bendigedig yn nechrau’r gwanwyn i’r rhododendronau gwych ddiwedd mis Mai.

• Cae’r cennin Pedr – peidiwch â cholli’r cennin Pedr Cymreig wrth iddynt weddnewid y lawnt wag a chreu arddangosfa felyn drawiadol.

 

6 Ionawr – 11 Ebrill: Llwybr mewn Bag, Rhifyn y Gwanwyn

Ymunwch â ni ar lwybr meddylgarwch a luniwyd ar gyfer pobl o bob oed. Ewch i’r Swyddfa Docynnau i nôl bag a dechreuwch eich ymweliad synhwyraidd. Casglwch, gwnewch luniau, chwiliwch a gwrandewch.

Dewch i ddarganfod harddwch gerddi Castell Powis gyda’n gweithgaredd hwyliog Llwybr mewn Bag! Mae’r llwybr hunandywysedig hwn yn berffaith i anturiaethwyr o bob oed, gan gynnig ffordd unigryw i ymgysylltu â natur a datgelu rhyfeddodau cudd. Gafaelwch yn eich bag, ewch ar daith trwy’r gerddi hanesyddol a chwblhewch yr heriau cyffrous ar hyd y ffordd.

Pa un a ydych yn gwirioni ar natur neu’n chwilio am ddiwrnod allan sy’n llawn hwyl, mae’r Llwybr mewn Bag yn cynnig ffordd wych o archwilio gerddi Castell Powis. Cofiwch rannu eich darganfyddiadau a’ch lluniau gyda ni!

 

15 Chwefror – 11 Ebrill: Llwybr Dan Do

Yr hanner tymor hwn, beth am ymestyn eich antur yng Nghastell a Gardd Powis gyda gweithgaredd dan do cyffrous, sef Llwybr mewn Bag! Rhwng 15 Chwefror a 11 Ebrill, byddwn yn cynnig fersiwn dan do o’n llwybr awyr agored poblogaidd. Ewch i’r Dderbynfa Ymwelwyr i nôl bag pwrpasol ac archwiliwch yr ystafelloedd rhyfeddol a’r trysorau cudd. Mae’r llwybr dan do yn ategu’r profiad awyr agored, gyda phethau annisgwyl a gweithgareddau ychwanegol i’w darganfod wrth ichi archwilio’r adeilad crand. Mae’r llwybr hwn yn berffaith i deuluoedd, gan gynnig ffordd wych o ddod i adnabod hanes a phensaernïaeth y castell.

 

30 Mawrth: Sul y Mamau

Yng Nghaffi’r Cwrt, beth am dretio rhywun arbennig i ddiwrnod bythgofiadwy yn archwilio castell o’r drydedd ganrif ar ddeg a gardd fyd-enwog, cyn eistedd i lawr i fwynhau detholiad o frechdanau, sgons a chacennau blasus. Hefyd, cewch fwynhau gwydraid o ‘prosecco’ neu ddiod arall nad yw’n cynnwys alcohol. Bydd ein tîm Bwyd a Diod yn cynnig trît arbennig i famau, a fydd ar gael ar y diwrnod.

Y pris yw £24.95 y pen, neu £27.95 y pen gyda ‘prosecco’. Trefnwch ymlaen llaw trwy ffonio 01938 551927.

 

11 – 28 Ebrill: Llwybr y Pasg

Rhwng 12 Ebrill a 27 Ebrill, dewch draw i gymryd rhan mewn llwybr hunandywysedig i deuluoedd, a fydd yn eich tywys trwy’r ardd fyd-enwog. Bydd y llwybr hwn sy'n costio £3.50 y plentyn, ar gael bob diwrnod rhwng 10.00am a 3.30pm ac mae'r ffioedd mynediad arferol yn berthnasol. Dewch i neidio, sboncio a llamu ar hyd y llwybr ac i ddarganfod y gweithgareddau rhyngweithiol llawn hwyl ar hyd y ffordd wrth grwydro trwy’r terasau, yr ardd ffurfiol, o amgylch y lawnt a thrwy’r coetiroedd.

Ar ôl cwblhau’r llwybr, ewch i nôl wy siocled, wy figan neu wy heb gynhwysion penodol eraill ynddo gan ein tîm cyfeillgar yng nghaffi’r ardd, a chofiwch gael stamp ar eich taflen. Ar ôl yr holl antur, ewch i Gaffi’r Cwrt i roi gorffwys i’ch coesau blinedig. Cewch fwynhau dewis eang o fwydydd poeth ac oer, ynghyd â chacennau a sgons cartref hynod flasus. Mae yna rywbeth at ddant pawb, oherwydd rydym yn cynnig bwydlen i blant ochr yn ochr â dewis o fyrbrydau a phrydau heb glwten.

Sylwer: os byddwch yn ymweld yn ystod 2025, efallai y cewch docyn wedi’i amseru neu efallai y bydd yn rhaid ichi ymuno â thaith swyddogol oherwydd y gwaith ailweirio sy’n cael ei wneud yn y castell. Ni fydd angen gwneud trefniadau ymlaen llaw i ymweld â’r castell – ar ôl cyrraedd, ewch i’r caban croeso yn y maes parcio. Cymerwch gipolwg ar y wefan i gael y manylion diweddaraf.

 

Darganfod y Dreigiau

Mae dwy ddraig gyfeillgar wedi glanio yn y Gwyllt, sef coetir anffurfiol y tu ôl i’r brif ardd. Eisteddwch ar eu cyfrwyau a gadewch i’ch dychymyg eich cludo ar antur anhygoel. Mae’r dreigiau hyfryd hyn yma i bawb eu mwynhau a’u dringo.

Cafodd yr ychwanegiadau newydd hyn at yr ardd eu creu’n grefftus gan Simon O’Rourke, artist enwog o’r ardal.

 

Rhannwch eich lluniau ar y cyfryngau cymdeithasol

Os hoffech rannu eich lluniau gyda ni, defnyddiwch yr hashnod #CastellPowis #PowisCastle a thagiwch ni @PowisCastleNT