Arfordiroedd a thraethau Sir Benfro

Yr olygfa dros Freshwater West a Fferm Gupton, Sir Benfro — Fferm Gupton yn Freshwater West | © National Trust Images/Owen Howells

Darganfyddwch draethau eang, cefn gwlad hardd sy’n gyfoeth o fywyd gwyllt ac arfordir garw ar ymweliad â Sir Benfro. O nofio yn Ne Aber Llydan neu ymweld â’r adar ar Ynys Sgomer i ddarganfod caerau Oes yr Haearn yn Solfach, dysgwch fwy am bethau i’w gweld a’u gwneud ar rai o arfordiroedd a thraethau gorau Cymru.

Arfordiroedd a thraethau Sir Benfro

Stagbwll: Ewch i gaiacio neu arfordira o Gei Stagbwll, neu treuliwch y diwrnod ar un o’n traethau teuluol trawiadol, De Aber Llydan neu’r byd-enwog Fae Barafundle. Mae digon o lwybrau cerdded i’w concro hefyd, gyda llynnoedd Bosherton a’r coetir cyfagos i’w darganfod. Galwch yn y dderbynfa yng Nghanolfan Stagbwll i gael rhagor o wybodaeth am ein llwybrau.Trefnwch eich ymweliad â Stagbwll
Freshwater West a Fferm Gupton: Traeth llydan a thywodlyd trawiadol gyda thwyni mawr, a lle poblogaidd i syrffwyr profiadol. Mae digon o dywod i adeiladu cestyll tywod campus, hedfan barcud neu fynd am dro ar hyd y darn gwyllt hwn o arfordir. Mae system o dwyni tywod naturiol a gwlyptir eang, Cors Castellmartin, yn gefn i Freshwater West, gydag amrywiaeth o gynefinoedd ar gyfer adar sy’n nythu ar y ddaear. Felly cofiwch eich binocwlars.Trefnwch eich ymweliad â Freshwater West
Traeth a Chors Marloes: Mae Penrhyn Marloes ar ymyl orllewinol Sir Benfro yn gyfuniad lliwgar o arfordir a chefn gwlad. Mae’n baradwys i bawb sy’n caru’r traeth a gwylwyr adar fel ei gilydd, ac mae hefyd yn lle gwych i ddarganfod hanes a daeareg. Mae Traeth Marloes yn ddarn diogel, tywodlyd o draeth sy’n addas ar gyfer nofwyr, a thua’r tir mawr fe welwch Gors Marloes, gwlyptir pwysig ar gyfer adar sy’n bridio, adar mudol ac adar sy’n treulio’r gaeaf yma.Trefnwch eich ymweliad â Thraeth a Chors Marloes
Martin’s Haven: Martin’s Haven yw harbwr y penrhyn a chanolfan Parth Cadwraeth Morol Sgomer, y cyntaf o’i fath yng Nghymru. Neidiwch ar fwrdd llong i Ynysoedd Sgomer a Sgogwm a darganfod poblogaethau rhyngwladol-bwysig o adar môr sy’n bridio, gan gynnwys palod, gweilch y penwaig, gwylogod ac adar drycin Manaw.Trefnwch eich ymweliad â Martin’s Haven

Teulu’n padlo yn y môr yn Nhraeth Marloes, Sir Benfro | © National Trust Images/Chris Lacey

Stad Southwood: Darganfyddwch dirwedd oesol o ddyffrynnoedd coediog, caeau blodeuog a chlogwyni geirwon. Mae’n lle prydferth i fynd am dro, ac mae ffiniau traddodiadol y caeau’n gwneud i chi deimlo eich bod yn camu i’r gorffennol. Mwynhewch y golygfeydd gwych o’r môr a chadwch olwg am doreth o fywyd gwyllt ar eich anturiaethau.Trefnwch eich ymweliad â Stad Southwood
Arfordir Solfach: Darganfyddwch gaerau Oes yr Haearn, odynau calch a hen felinau yn swatio ar hyd arfordir Sir Benfro. Yn ardal wych i balu drwy hanes, o Harbwr Solfach gallwch ddarganfod y pentref neu fynd am dro i’r Gribin, sy’n cynnig golygfeydd godidog. Mae’r garreg sy’n dal i gael ei defnyddio i drwsio eglwys gadeiriol Tyddewi i’w chanfod ar waelod cwm prydferth, cysgodol Caerbwdi, sy’n estyn yr holl ffordd i’r môr.Trefnwch eich ymweliad ag Arfordir Solfach
Penrhyn Dewi: Wedi’i henwi ar ôl nawddsant Cymru, Tyddewi yw dinas leiaf gwledydd Prydain. Mae’r groes ganoloesol sy’n nodi ei chanol yn un o nifer ar hyd llwybr pererindota hanesyddol i’r gadeirlan. Mae’r penrhyn yn cynnig llwybrau cerdded arfordirol hardd gyda blodau gwyllt ac adar yn lliwio’r lleoliad. Darganfyddwch Gomin Tyddewi lle gwelwch amrywiaeth o blanhigion rhostir, neu ewch i Benmaen Dewi i wylio adar.Trefnwch eich ymweliad â Phenrhyn Dewi
Abereiddi i Abermawr: Mae’r darn gwyllt o arfordir rhwng Abereiddi ac Abermawr i gyd am ddiwydiant a darganfod yr arfordir dramatig. Gwyliwch forloi sy’n bridio o ben y clogwyni ym mis Medi, neu rhyfeddwch at lesni perffaith y Morlyn Glas wrth i chi ddarganfod yr arfordir garw hwn a’i olygfeydd.Trefnwch eich ymweliad ag Abereiddi
Pen Strwmbl i Aberteifi: Dyma’r darn mwyaf garw ac anghysbell o arfordir Sir Benfro. O gopa Garn Fawr ger Pen Strwmbl i glogwyni Pen yr Afr yn y gogledd, cewch ryfeddu at olygfeydd gogoneddus o’r môr o’r clogwyni enfawr. Bydd y llwybrau arfordirol yma yn siŵr o’ch syfrdanu.Pen Strwmbl i Aberteifi

Yr olygfa dros Fae San Ffraid, yn edrych tua’r Dwyrain o harbwr Porth Clais gyda chlogwyni dramatig a nythfa o adar môr, Sir Benfro, Cymru — Yr olygfa dros Fae San Ffraid, Sir Benfro | © National Trust Images / Joe Cornish

Traethau i gŵn yn Sir Benfro

Mae croeso i gŵn da ar draethau Sir Benfro, oni bai bod angen cadw cŵn i ffwrdd am resymau sy’n ymwneud â chadwraeth natur. Gall hyn fod yn ddibynnol ar yr adeg o’r flwyddyn, felly ewch i wefan y traeth neu’r arfordir i gadarnhau a allwch ddod â’ch ci cyn eich ymweliad.

Cŵn ac anifeiliaid fferm

Wrth ymweld, talwch sylw i unrhyw arwyddion lleol am gerdded cŵn – er enghraifft, a oes angen i’ch ci fod ar dennyn. Dylai cŵn gael eu cadw ar dennyn o gwmpas anifeiliaid, ond os oes gwartheg neu anifeiliaid mawr eraill yn cwrso eich ci, y peth gorau i’w wneud yw gadael y tennyn i fynd tan eich bod wedi gadael yr ardal.

Dilynwch y cod cefn gwlad

Helpwch i gadw arfordiroedd a thraethau Sir Benfro’n ddiogel a dymunol drwy gadw at rai canllawiau syml yn ystod eich ymweliad a dilyn y Cod Cefn Gwlad.

Parchwch bobl eraill

Byddwch yn ystyrlon o’r gymuned leol a phobl eraill sy’n mwynhau ac yn gweithio yn yr awyr agored
Parciwch yn ofalus gan sicrhau bod gatiau a dreifiau’n cael eu cadw’n glir
Gadewch gatiau ac eiddo fel yr oedden nhw pan gyrhaeddoch chi
Dilynwch lwybrau sydd wedi’u marcio ac arwyddion lleol
Byddwch yn gyfeillgar, dwedwch shwmae

Diogelu’r amgylchedd naturiol

Peidiwch â gadael dim ar eich ôl – ewch â’ch sbwriel adref
Byddwch yn ofalus gyda barbeciws a thanau – defnyddiwch nhw mewn ardaloedd pwrpasol yn unig
Cadwch gŵn dan reolaeth
Baw ci – yn y bag, yn y bin – mae unrhyw fin cyhoeddus yn iawn