Y gerddi yn Nyffryn

Uchafbwyntiau’r gwanwyn

Mae’r ardd yn hardd drwy gydol y flwyddyn, ond mae’r gwanwyn bob amser yn ddathliad mawr o oleuni, lliw a gwead.

Cyn gynted ag y cyrhaeddwch, bydd y cennin Pedr llon yn eich cyfarch wrth y fynedfa, a gallwch eu gweld yma ac acw ar bob cam o’ch taith drwy’r gerddi. Ar ddechrau eich siwrne, fe welwch ein henwog Fanc y Cynel – sy’n fôr o grocysau, cennin Pedr a lilis bach gwynion hwyr. Mae pobl yn ymweld â ni bob blwyddyn i dynnu llun o Fanc y Cynel pan mae ar ei harddaf.

O’r fan hon, cerddwch i’r Ardd Goed i weld y blagur yn dechrau agor, neu crwydrwch i Lawnt y De i weld yr arddangosfeydd helaeth o diwlipau a chennin Pedr, sy’n dod â bach o wmff i ffurfioldeb y lawnt. O’r fan hon gallwch weld y coed Magnolia yn britho’r olygfa’n binc a gwyn, gan eich denu i ddarganfod y Gardd-Ystafelloedd.

Cewch eich sgubo i bedwar ban byd yn ein Gardd-Ystafelloedd thematig, o’r Eidal yn ein Gardd Bompeiaidd (sydd newydd ailagor), lle bydd y Wisteria’n blodeuo’r holl ffordd i fyny colofnau’r ardd cyn bo hir, i bellafoedd byd yn yr Ardd Egsotig. Yng Ngerddi’r Gegin gerllaw, mae blagur y Coed Gellyg, Afalau a Bricyll yn ffrwydro, ac mae blagur enwog ein Coed Ceirios yn dechrau ymestyn ei freichiau ar draws y safle.

Mae’r gwanwyn yng Ngerddi Dyffryn wir yn wledd i’r llygaid.

Anturiaethau’r Pasg

Dewch i Erddi Dyffryn ar 7-22 Ebrill i ddilyn ein llwybr Pasg unigryw a diddorol - hwyl i bawb o bob oedran.  Mae ’na 10 o weithgareddau eleni – maen nhw i gyd yn ymarferol, yn seiliedig ar y Pasg, ac wedi’u cynllunio i bob aelod o’r teulu eu mwynhau. Cwblhewch y llwybr a chasglu ŵy Pasg siocled llaeth neu figan/Rhydd Rhag*. Mae llwybr Pasg Dyffryn yn gyfle i bob aelod o'ch teulu, o'r ieuengaf i'r hynaf, gael hwyl a chreu atgofion gwerthfawr dros y Pasg.  Y gost yw £3.50 y llwybr (bydd angen talu’r pris mynediad arferol hefyd) a does dim angen archebu.  Dysgwch fwy ar y dudalen digwyddiadau.

*Yn addas i bobl ag alergeddau llaeth, wyau, glwten, cnau mwnci a chnau coed.

Taith gerdded ‘Ble mae’r blagur?’ 

O fis Mawrth i fis Mai cymerwch ran yn #GwleddyGwanwyn a chadw llygad am arwyddion o’r gwanwyn wrth i wahanol goed ddechrau blodeuo. Dilynwch ein Llwybr Gwledd y Gwanwyn i ddod o hyd i uchafbwyntiau gorau’r gwanwyn. Casglwch fap Llwybr Gwledd y Gwanwyn o’r Ganolfan Groeso wrth gyrraedd a bydd yn eich tywys o amgylch yr enghreifftiau gorau a harddaf o flodau'r gwanwyn yn ein gerddi. Tra byddwch chi ar eich taith, dysgwch sut i dynnu lluniau gwych o flodau yn ein gorsafoedd ffotograffiaeth ymarferol. Neu benthycwch becyn creadigol am ddim (sy'n cynnwys pad braslunio a phaent dyfrlliw) i gofnodi'r blagur drwy fath gwahanol o gelf. 

Drwy gydol y tymor, bydd yr hyn a welwch ar eich taith yn newid, felly mae'n werth galw ’nôl ambell dro i weld y gorau o'r tymor cyfan. Cadwch eich map a dewch yn ôl trwy gydol y gwanwyn i weld y cyfan.

Does dim tâl ychwanegol am fap Llwybr Gwledd y Gwanwyn (ond bydd angen talu’r pris mynediad arferol i’r gerddi).

Teithiau blagur

Bydd teithiau blagur am ddim gyda Phrif Dyfwr Coed Dyffryn, Rory yn digwydd drwy gydol tymor y blagur. Maen nhw’n gyfle gwych i weld y blagur gorau ar y pryd, ymweld â rhannau o'r tiroedd nad ydyn nhw’n cael eu gweld yn aml, a dysgu mwy am ein coed a'n harferion garddio.

Er bod y teithiau am ddim, rydyn ni’n argymell eich bod chi’n cadw lle ymlaen llaw i sicrhau na chewch eich siomi ar y diwrnod. Cadwch eich lle yn yr adran digwyddiadau.

Helios yng Ngerddi Dyffryn

Dewch i weld yr haul fel erioed o'r blaen. Mae Helios yn gerflun sfferig saith metr goleuedig gan yr artist Prydeinig Luke Jerram. Profwch Helios yng Ngerddi Dyffryn ar 23-26 Mai a 29 Mai-1 Mehefin. Gyda goleuadau’n ymdonni, delweddau solar a synau'r haul wedi'u recordio gan NASA, mae hwn yn gyfle gwych i weld y rhyfeddod clyweledol hwn ar ddangos yn yr awyr agored.

Bydd Helios yn effeithio ar oriau agor Dyffryn, ac er y bydd y gwaith celf yn cael ei arddangos dros benwythnosau hanner tymor mis Mai, ni fydd i fyny am ddau ddiwrnod yng nghanol hanner tymor (Dydd Mawrth 27 Mai a Dydd Mercher 28 Mai).

Bydd ’na hefyd lawer o raglenni o amgylch Helios, gan gynnwys perfformiadau, llwybrau, awr hamddenol, pecynnau creadigol ac oriau agor hwyr. Ewch i’n tudalen Helios arbennig am yr holl wybodaeth ddiweddaraf.