Ymweld â fila John Nash yn Llanerchaeron

Ystafell ffrynt gyda phiano, lle tân, gramoffon a chyrtens pinc hir yn erbyn papur wal streipiog — Y tu mewn i’r fila, Llanerchaeron | © National Trust / Heather Birnie

Yng nghanol tlysni Dyffryn Aeron, mae fila John Nash yn gwneud y gorau o’r golygfeydd o’r dirwedd drawiadol.  Camwch drwy’r drws ac fe welwch sut mae symlrwydd yr ochr allan yn cuddio amrywiaeth o siapiau a manylion cymhleth, yn ogystal ag enghraifft brin o iard wasanaeth gyflawn, sy’n swatio yng nghefn y tŷ.

Pethau i'w gweld yn fila Llanerchaeron

Cwblhawyd plasty’r teulu yn Llanerchaeron ym 1795 yn ôl dyluniad John Nash, pensaer uchelgeisiol nad oedd wedi ennill ei blwyf eto. Mae plasty Llanerchaeron yn Fila Sioraidd o arddull Paladaidd – yr arddull a ddysgwyd i Nash yn ystod ei saith mlynedd fel disgybl gyda Robert Taylor, pensaer Paladaidd arbenigol a ddyluniodd Neuadd Tref Caerfyrddin yn yr un arddull yn ystod yr un cyfnod.

Symlrwydd hardd

Ar yr olwg gyntaf, mae’r tŷ yn un syml – bocs deulawr plaen o stwco a llechi. Ond gwnaeth Nash ei leoli’n ofalus iawn i wneud y gorau o’r golygfeydd o’r dirwedd drawiadol. Trefnodd y prif ystafelloedd o gwmpas cyntedd grisiau canolog wedi’i oleuo o uwchben.

Y grisiau yn y fila yn Llanerchaeron, Ceredigion | © NTI/Paul Harris

Dylunio mewnol o safon

Mae’r ystafelloedd yn dangos ei feistrolaeth o siapiau cymhleth a manylion clasurol cynnil. Cadwch olwg am y ffrisiau gwaith plastr yn arbennig: mae pob un yn unigryw, a phob un o’r safon uchaf.

Ardal y gweision

Mae ardal y gweision yng nghefn y tŷ yn dangos y gwahaniaeth rhwng bywyd bob dydd y teulu a’u staff dyfal. Mae lle tân Edwardaidd yn y gegin sydd yn aml wedi’i gynnau i bobi, felly cofiwch gadw golwg am bice ar y maen cartref.

Iard sgwâr wedi’i hamgylchynu gan waliau gwyn a nifer o ddrysau — Yr iard wasanaeth, Llanerchaeron | © National Trust / Aled Llywelyn

Yr iard wasanaeth

Dyma un o’r ardaloedd mwyaf diddorol a phwysicaf yn Llanerchaeron, ac mae’n unigryw bron am oroesi yn ei ffurf wreiddiol. Cafodd ei gynllunio i fod mor effeithlon â phosib, ac mae’n adrodd hanes cudd yr holl waith sydd ei angen i redeg plasty.

Yn yr iard wasanaeth fe welwch y llaethdy, y gegin laeth, yr ystafell cawswasg a’r storfa, y popty, yr ystafell fygu, yr ystafell halltu, y bragdy a’r ystafell olchi sych.

Cadwch olwg am ein cathod preswyl sydd i’w gweld yn aml y tu allan, yn yr iard wasanaeth.

Ffilm hygyrch am Fila Llanerchaeron

Mae Ystafell Biliards yng nghefn y tŷ yn cynnwys ffilm fer am gynllun mewnol a hanes y Fila Sioraidd a ddyluniwyd gan John Nash. Cafodd y ffilm ei chreu er mwyn i bawb allu archwilio a mwynhau’r tŷ a’r tu mewn, yn enwedig os nad ydych chi’n gallu mynd i loriau uchaf y tŷ oherwydd y grisiau.

Casgliad Pamela Ward

Mae dwy hen ystafell wely yn y fila yn Llanerchaeron yn gartref i gasgliad unigryw o hen eitemau a hynodion, sef Casgliad Pamela Ward. Yn eclectig ac amrywiol, mae’n drysorfa o eitemau diddorol ac, yn aml, anarferol a oedd yn berchen i ddynes a oedd yr un mor ddiddorol â’i chasgliad.