Garddio yng Nghastell Powis

Diwrnod heulog gyda golygfa o Ardd Castell Powis yng Nghymru yn dangos y garddwr yn tocio’r gwrychoedd ywen a’r gwrychoedd pren bocs a’r bryniau yn y pellter — Garddwr ar beiriant codi yn tocio’r gwrychoedd yng Nghastell Powis, Cymru | © National Trust Images / Arnhel de Serra

Mae’r ‘twmpathau’ mawr ywen a’r milltiroedd o wrychoedd pren bocs yn olygfa enwog yng Nghastell Powis. O arddio eithafol i hanes o docio gwrychoedd, dysgwch ragor am ein gwaith yn cadw’r tirlun hardd hwn mewn trefn.

Garddio eithafol yng Nghastell Powis

Mae bron i 8,500 metr sgwâr o wrychoedd ffurfiol yng ngerddi Castell Powis. Mae’r 14 o ‘dwmpathau’ ywen a gwrych y teras uchaf yn ychwanegu 7,000 metr sgwâr arall at hyn. Ond sut mae ein garddwyr yn cadw’r llwyni 14 metr o uchder yma yn edrych mor wych?

‘Mae tocio’r coed tocwaith uchel yn dasg anferth. Mae’n cymryd tua 10 wythnos i un garddwr ar beiriant codi hydrolig i wneud y gwaith.’

– David Swanton, Prif Arddwr

‘Twmpathau’ ywen

Mae’r yw wedi eu tocio ar hyd y terasau yn aros ar y meddwl ymhell ar ôl ymweliad, nid yn unig oherwydd eu maint anferth, ond oherwydd eu bod yn elfen mor bwysig o’r ardd.

Mae cadw’r ‘twmpathau’ yw yn y cyflwr gorau un yn her, ond mae ein garddwyr yn gwneud i’r dasg ymddangos yn hawdd. Yn hwyr yn yr haf a’r hydref cynnar maent yn codi i’r awyr mewn peiriant codi ac yn treulio sawl wythnos yn tocio coed tocwaith uchel yr ardd. Bydd hyn yn gwarantu y bydd y gwrychoedd yn edrych yn wych am y 12 mis nesaf.

Golygfa o’r borderi blodau a’r gwrychoedd pren bocs ar deras yr orendy yng ngardd Castell Powis ar ddiwrnod heulog ym mis Gorffennaf — Lliw haf yng Nghastell Powis | © National Trust Images / Mark Bolton

Tocio’r gwrychoedd

Mae’n dasg anferth gwneud yr holl waith tocio yng Ngardd Castell Powis. Bydd dau arddwr yn treulio chwe wythnos yn tocio’r gwrych pren bocs a dau arall yn treulio 12 wythnos yn gweithio ar yr yw. Bydd un garddwr yn treulio tua 10 wythnos yn yr awyr ar y peiriant codi hydrolig, yn gwneud yr holl waith tocio.

Garddio hen ffasiwn

Efallai ei bod yn swnio’n dasg anferth, ond mae ein tîm yn y gerddi’n eithaf lwcus. Hyd yn gymharol ddiweddar, roedd yn cymryd pedwar mis llawn i 10 o ddynion docio’r holl wrychoedd bocs ac ywen. Byddent yn defnyddio offer llaw ac yn sefyll ar ysgolion hir iawn. Byddent yn cael eu clymu hefo’i gilydd pan oedd angen, i gyrraedd blaen yr yw talaf. Mae peiriannau trydan yn gwneud gwahaniaeth mawr ac yn lleihau’r dasg yn sylweddol.