Ble i weld cennin Pedr yng Nghymru

Menyw a phlentyn yn edrych ar y cennin Pedr yn yr ardd yng Nghastell Powis ym Mhowys, Cymru — Ymwelwyr yn edmygu’r cennin Pedr yng Nghastell Powis | © National Trust Images/Paul Harris

Wrth i ddiwrnodau oer, tywyll y gaeaf ddirwyn i ben, mae ein hemblem cenedlaethol yn blodeuo ledled Cymru, gan lonni’r dirwedd a dathlu dyfodiad y gwanwyn. Darganfyddwch yr arddangosfeydd cennin Pedr gorau o fis Chwefror i ddechrau Mai yn y gerddi rydym yn gofalu amdanynt ym mhob cwr o’r wlad.

Emblem cenedlaethol Cymru

Mae llawer o straeon am sut daeth y genhinen Bedr yn un o symbolau enwocaf Cymru, ond yn ôl y sôn dechreuodd popeth gyda’r genhinen ddiymhongar. Mewn brwydr, dywedodd Dewi, nawddsant Cymru, wrth ei filwyr am wisgo cenhinen i’w galluogi i wahaniaethu rhwng ei gilydd â’u gelynion, y Sacsoniaid.

Heddiw, mae’r ddau emblem yn cael eu gwisgo ar Ddydd Gŵyl Dewi ar Fawrth y 1af.

Ble i weld cennin Pedr yng Ngogledd Cymru

Golygfa o gennin Pedr yn y ddôl gyda’r tŷ yn y cefndir yng Ngardd Bodnant yng Nghonwy, Gogledd Cymru — Dôl y cennin Pedr yng Ngardd Bodnant, Gogledd Cymru | © National Trust Images/Derek Hatton

Gardd Bodnant, Conwy: Mae cenedlaethau o arddwyr wedi bod yn plannu cennin Pedr ym Modnant ers 1920, ac rydym yn dal i ychwanegu at yr arddangosfa heddiw. Mor gynnar â mis Ionawr, mae’r narsisws ‘Cedric Morris’ a’r Narcissus cyclamineus, neu’r genhinen Bedr atblygol, i’w gweld yng Ngardd y Gaeaf. Yna ym mis Mawrth a mis Ebrill, mae dôl yr Hen Barc a’r Glennydd yn fôr o felyn wrth i’r Narcissus pseudonarcissus cyffredin a llawer o fathau eraill flodeuo.Ymwelwch â Gardd Bodnant
Neuadd a Gardd Erddig, Wrecsam: Mae’r gwanwyn ar ddod gydag arddangosfa liwgar o gennin Pedr yng Ngerddi Castell y Waun. Mae amrywiaethau fel Narcissus cyclamineus a Narcissus ‘King Alfred’ yn ffynnu yn y ddôl a elwir yn ‘Llain y Cennin Pedr’ ac ar hyd y Rhodfa Goed Leim wrth y cerflun Hercules, lle maent yn fframio golygfeydd prydferth o’r castell. Eleni, mae’r cennin Pedr brodorol Prydeinig (Narcissus pseudonarcissus) sydd wedi’u plannu’n ddiweddar ym mynedfa’r ganolfan ymwelwyr ac yn yr Ardd Gegin, yn ychwanegu fflach ychwanegol o liw tymhorol.Dewch i Gastell y Waun
Castell Penrhyn, Gwynedd: Mae’r cennin Pedr cyntaf yng Nghastell Penrhyn yn aml yn dangos eu pennau ar ddiwedd Chwefror, mewn da bryd ar gyfer Dydd Gŵyl Dewi. Yna maent yn mynd o nerth i nerth – maen nhw ar eu hanterth o ganol Mawrth i ddiwedd Ebrill. Mae’r carped campus o felyn - mor ddramatig â’r castell Cymreig ei hun - yn gorchuddio pob twll a chornel o’r ardaloedd coediog o flaen ac i ochr y castell, yn ogystal ag o flaen y Gorthwr.Ymwelwch â Chastell Penrhyn
Tŷ a Gardd Plas Newydd, Ynys Môn: Yn fuan wedi’r eirlysiau y disgwylir i gennin Pedr roi sioe hyfryd yn yr ardd, yr ardd goed a’r parcdir hudolus ym Mhlas Newydd. Yn edrych dros y Fenai, fe welwch glystyrau o gennin Pedr melyn yn dawnsio o dan heulwen y gwanwyn ac wedi’u gosod hwnt ac yma o gwmpas yr ardd, gan ychwanegu lliw bywiog i’r ardd ffurfiol a’r borderi o flodau. Mae disgwyl i'r cennin Pedr fod ar eu gorau tua chanol mis Mawrth.Dewch i Dŷ a Gardd Plas Newydd

Ble i weld cennin Pedr yng Nghanolbarth Cymru

Golygfa o gennin Pedr yn yr ardd gyda Chastell Powis ar y bryn yn y cefndir ym Mhowys, Canolbarth Cymru. — Cennin Pedr yn eu blodau yng Nghastell Powis, Canolbarth Cymru | © National Trust Images/Paul Harris

Llanerchaeron, Ceredigion: Mae gan Lanerchaeron draddodiad hir oes gyda chennin Pedr, ac yn y gorffennol cynhaliwyd penwythnos agored blynyddol er anrhydedd hoff flodyn y teulu Lewis. O ddechrau mis Chwefror tan ganol mis Mawrth, mae’r cennin Pedr yn ychwanegu lliw i’r ystâd, o’r coetir ger yr afon i’r Lawnt Croce, yr Ardd Furiog a’r berllan. Y gaeaf hwn, plannwyd 11,000 o fylbiau newydd, gan gynnwys y rhai sy’n blodeuo’n gynnar fel February Gold a Rijnveld’s Early Sensation, yn ogystal â ffefrynnau fel St Keverne and Stainless. Cadwch lygad allan am y Gwelyau Blodau i’w Casglu yn yr Ardd Furiog Ddwyreiniol, ac yno fe welwch gennin Pedr ymhlith brithegion, garlleg, camassia a thiwlipau i greu arddangosfa anhygoel y gwanwyn.Ymwelwch â Llanerchaeron
Castell a Gardd Powis, Powys: Mae Gardd deras Baróc Castell Powis, gyda’i golygfeydd trawiadol am Ddyffryn Hafren yn dod yn fyw yn y gwanwyn. O ganol mis Mawrth tan ddiwedd mis Ebrill, mae miloedd o gennin Pedr Cymreig (Narcissus pseudonarcissus) yn gorchuddio'r Llain Cennin Pedr gyda môr o felyn. Mae magnolias, fioledau, tiwlipau a chlychau dulas yn blodeuo ar draws yr ardd, a blodau pinc a gwyn y magnolias yn creu arddangosfa brydferth. Wrth i chi grwydro’r safle, mwynhewch yr wisteria ar hyd yr Adardy a blodau pinc a gwyn y coed afal yn yr Ardd Ffurfiol Edwardaidd.Ymwelwch â Chastell a Gardd Powis

Ble i weld cennin Pedr yn Ne Cymru

Golygfa o’r tŷ drwy gennin Pedr yng Ngerddi Dyffryn ger Caerdydd yn Ne Cymru — Cennin Pedr yng Ngerddi Dyffryn, De Cymru | © National Trust Images/Rachael Warren

Gardd Goedwig Colby, Sir Benfro: Cadwch lygad allan am glystyrau trwchus o gennin Pedr yn y dôl a llethr y ddôl yng Ngardd Goetir Colby. Yn 2011 a 2015, plannwyd 6,000 o fylbiau cennin Pedr, gan addo arddangosfa drawiadol o ddiwedd mis Chwefror - er mae’r tywydd oer diweddar yn golygu nad ydym yn gwbl sicr pa bryd yn union y byddant yn eu blodau. Mae’r gwanwyn hefyd yn dod â phentwr o glychau’r gog a chrocysau, gyda llu o gamelias, asaleas a rhododendronau wedi hynny.Ymwelwch â Gardd Goedwig Colby
Gerddi Dyffryn, Caerdydd: Mae dros 50 o wahanol fathau o gennin Pedr yn pefrio ar lawntiau ac gardd-ystafelloedd Gerddi Dyffryn. O’r Narcissus bulbocodium, neu’r genhinen Bedr gylchog fechan, yn yr Ardd Gerrig i’r mathau ‘sioe’ melyn, gwyn a hufen mawr, does unman gwell i gofleidio’r gwanwyn. A pheidiwch â methu eu brîd eu hunain o genhinen Bedr: Narsisws ‘Dyffryn’, a enillodd statws rhyngwladol fel brîd newydd yn 2014.Ymwelwch â Gerddi Dyffryn
Tŷ Tredegar, Casnewydd: Ewch drwy’r giatiau i Ardd y Berllan a Gardd y Gedrwydden i weld capredi o gennin Pedr melyn o dan y coed blodeuol. Yn fuan iawn, bydd cennin Pedr melyn, gwyn ac oren, gan gynnwys Sir Winston Churchill, Silver Chimes, Sail Boat a’r Julia Jane hyfryd yn gweddnewid yr ardd. Maen nhw wedi’u gwasgaru ymysg yr Ysgorpionllys cain (Myosotis) i ychwanegu rhagor o liw. O ddechrau mis Mawrth, mae cennin Pedr euraidd yn gorchuddio’r Rhodfa Dderw ac yn amgylchynu’r goeden Gastanwydden Bêr 250 mlwyddyn oed yn y parcdir. Bu i’n bylbiau Crocws a blannwyd yn y gaeaf wynebu ychydig o heriau wrth i wiwerod yr eiddo dyllu o’u cwmpas, felly rydym yn edrych ymlaen at weld faint ohonynt sydd wedi goroesi.Dewch i Dŷ Tredegar