Cyfleoedd i wirfoddoli yng Nghastell Penrhyn a’r Ardd

Grwp o staff a gwirfoddolwyr yn eistedd yn glanhau yr eitemau copr yng nghasgliadau'r castell yn y Geginau Fictoraidd — Grwp o staff a gwirfoddolwyr yn glanhau yr eitemau copr yn y casgliadau. | © National Trust Images/Sioned Griffiths

Mae ein gwirfoddolwyr yn rhan hanfodol o dîm Castell Penrhyn. Maent yn cefnogi’r gwaith cynnal a chadw ac yn croesawu ymwelwyr i’r castell bob dydd. Os ydych chi’n berson brwdfrydig ac ymroddedig pam ddim ymuno hefo’r tîm arbennig?

Cyfleoedd i wirfoddoli yn y Penrhyn

Mae gennym wirfoddolwyr yn ystafelloedd y castell sy’n sôn am yr hanes a’r casgliadau, gwirfoddolwyr sy’n cyfarfod pobl a’u helpu i ddod o hyd i’w ffordd o gwmpas y castell a’r ardd. Mae gennym hefyd yrwyr bygis gwirfoddol, yn ogystal â chyfleoedd yn yr ardd, y siop, y caffi, y Gegin Fictoraidd, a gyda’r tîm cadwraeth.

Ewch i MyVolunteering a chwilio am Castell Penrhyn i ddarganfod pa gyfleoedd gwirfoddoli sydd gennym ar hyn o bryd.

Dewch i gyfarfod rhai o Dywyswyr y Castell

Mae ystafelloedd y castell, sy’n llawn gwrthrychau prydferth, gwaith crefft arbennig a hanesion difyr, yn rhoi’r cefndir i ble mae ein gwirfoddolwyr yn croesawu miloedd o ymwelwyr. Buom ni’n siarad gyda rhai o ein gwirfoddolwyr am eu hoff ystafell a gwrthrych yn y castell, eu hoff beth am wirfoddoli a be sy’n eu cadw nhw’n dod yn ôl.

Gwirfoddolwr yn sefyll ar y Grisiau Mawreddog addurniedig — Tecwyn yn sefyll ar y Grisiau Mawreddog addurniedig | © Kristina Banholzer

Tecwyn a'r lantarn wydr

Mae Tecwyn wedi bod yn gwirfoddoli yng Nghastell Penrhyn ers ei ymddeoliad yn 2018. Yn ystod ei yrfa, bu’n dod a myfyrwyr i ymweld â Chastell Penrhyn a chafodd ei ysbrydoli i wirfoddoli wedi gorffen ei waith. Wrth wirfoddoli, mae o wrth ei fodd yn siarad gydag ymwelwyr, gan rannu elfennau o hanes a diwylliant lleol gyda rhai o bell i ffwrdd yn ogystal â phobl ar ein stepen drws. Dyma fo ar y Grisiau Mawreddog, ei hoff ran o’r castell am ei bod hi mor olau, diolch i’r ffenest lantarn uwch ei ben. Wrth i ymwelwyr gyrraedd y grisiau, mae Tecwyn wrth ei fodd yn eu gweld yn cael eu syfrdanu gan y gwaith crefft arbennig sydd yn y rhan yma o’r castell. Mae digon i siarad am wrth i’r cerfiadau ddehongli bob math o ryfeddodau ac adrodd amryw o straeon.

Gwirfoddowr yn y llyfrgell gyda'r bwrdd Coromandel — Dave yn y llyfrgell gyda'r bwrdd Coromandel | © Kristina Banholzer

Dave a'r Bwrdd Coromandel

Yn dilyn ei ymddeoliad, roedd gan Dave ddigon i’w gadw’n brysur, ond roedd yn barod am sialens newydd. Er ei fod yn mwynhau siarad hefo pobl, roedd ychydig yn ofidus nad oedd yn gwybod digon i fod yn Dywysydd y Castell, ond cafodd ei annog gan wirfoddolwr arall i ymuno. Yn y pum mlynedd dilynol, mae Dave wedi dod yn wybodus iawn am hanes y castell. Bob dydd mae’n gwirfoddoli mae’n dysgu rhywbeth newydd, boed hynny drwy siarad gyda gwirfoddolwyr eraill neu drwy sgwrsio gydag ymwelwyr. Mae gwirfoddoli wedi bod yn gyfle iddo ddysgu gan a rhannu gwybodaeth gyda phobl o hyd a lled y byd. Yma, mae Dave yn y llyfrgell gyda’r Bwrdd Coromandel, ei hoff eitem yn y casgliad. Mae’n bren caled hynod unigryw, yn wreiddiol o India. Mae’r bwrdd, meddai Dave, yn pwysleisio'r rhinweddau prydferth ac ofnadwy sawl eitem ym Mhenrhyn. Mae’r pren Coromandel yn dod o goeden sydd wedi ei ddigoedwigo nes ei fod bron yn ddiflanedig er mwyn creu eitemau fel hyn ar gyfer tai mawr.

Gwirfoddolwr yn y Parlwr gyda chadair hebryngwr pinc — Mary yn y Parlwr gyda'r cadair hebryngwr | © Kristina Banholzer

Mary yn y Parlwr

Yn y llun yma, gwelir Mary yn y parlwr. Mae hi wastad wedi bod yn hoff iawn o dai mawr, a threuliodd ychydig o’i gyrfa yn gogyddes mewn tŷ mawr yn Sir Efrog. Teimlai fel ei bod hi’n treulio amser mewn golygfa o un o lyfrau Jane Austen pan mae hi yn ystafelloedd y castell. Mae hi’n hoff iawn o’r gadair binc tuag at flaen y llun yn enwedig, sef cadair hebryngwr. Dyma ddarn hanfodol o ddodrefn mewn plasty Fictoraidd gan eu bod yn sicrhau bod pob merch ifanc yn cael cwmni hebryngwr wrth gyfarfod gwyr bonheddig. Mae Mary wedi bod yn wirfoddol-wraig yng Nghastell Penrhyn ers pedair blynedd ac mae hi wir yn mwynhau treulio amser yn yr ystafelloedd yma. Mae hi’n egluro ei fod yn ddiddorol o bersbectif hanesyddol a gan ei fod yn gyfle i gyfarfod llawer o bobl wahanol.

Gwirfoddolwr yn sefyll gyda cromen wydr yn llawn adar tacsidermi lliwgar — Ted gyda'r cromen adar | © Kristina Banholzer

Ted a'r Cromen Adar

Cychwynnodd Ted wirfoddoli yng Nghastell Penrhyn hefo ei wraig ddeng mlynedd yn ôl. Roedd gan y ddau ddiddordeb mewn hanes, ac roedden nhw’n barod am sialens newydd, felly dyma gychwyn gwirfoddoli ym Mhenrhyn. Wrth ddod i mewn ar yr un diwrnodau pob wythnos, roedden nhw’n dod i adnabod y staff a’r gwirfoddolwyr eraill yn dda, gan deimlo synnwyr o gymuned ym Mhenrhyn. Ers cychwyn gwirfoddoli, mae Ted wedi cynnal ei waith ymchwil ei hun ar rhai o eitemau’r casgliad, gan gynnwys y gromen adar, sydd wrth ei ymyl yn y llun yma. Dyma arddangosfa o ddeuddeg aderyn trofannol lliwgar wedi eu stwffio, sy’n dal y llygaid, ac yn nodweddiadol o’r arfer i gasglu eitemau yn yr Oes Fictoraidd. Roedd eitemau fel hyn hefyd yn symbol o oruchafiaeth Brydeinig dros dir wladychedig. Fel hanesydd brwd a gwyliwr adar, mae’r gromen adar o ddiddordeb i Ted ac mae’n ffynhonnell ar gyfer sgyrsiau da gydag ymwelwyr.

Gwirfoddolwr yn yr Ystafell Frenhinol yng Nghastell Penrhyn hefo'r Crochenwaith Herculaneum | © Kristina Banholzer

Chris a'r Crochenwaith Herculaneum

Wedi bod yn aelod o’r Ymddiriedolaeth Genedlaethol drwy ei fywyd, daeth Chris yn wirfoddolwr yng Nghastell Penrhyn chwe blynedd yn ôl. Er iddo ennill ei fywoliaeth fel patholegydd, bu hefyd yn treulio amser yn delio mewn hynafolion, gan arbenigo mewn porslen Seisnig y ddeunawfed ganrif. Tua blwyddyn ar ôl dechrau gwirfoddoli fel Tywysydd y Castell, fe ddaeth ar draws Crochenwaith Herculaneum, i’w weld yn y llun yma, oedd yn y casgliad. Math o grochenwaith Seisnig yw’r gwasanaeth pwdin ‘hufen’ ac mae’n cynnwys cyfanswm o 6 plât a 6 dysgl swper, wedi’u haddurno â sbrigyn o ysgallen. Wedi cael hyd i'r crochenwaith, aeth Chris ati i wneud gwaith ymchwil a darganfod eu bod yn debygol o fod wedi cyrraedd Castell Penrhyn oherwydd bod Samuel Worthington yn asiant i Chwarel y Penrhyn o 1793 ymlaen a hefyd yn bartner sefydlu ffatri Crochenwaith Herculaneum.

1 of 5

Cwestiynau Cyffredin

Os ydych yn ystyried gwirfoddoli ond yn ansicr beth mae’n ei olygu neu beth fyddech chi’n ei gael o’r profiad, rydym wedi casglu gwybodaeth i chi i’ch helpu i gymryd y cam nesaf.

A oes angen i mi wybod yr hanes ymlaen llaw?

Does dim rhaid i chi boeni os nad ydych yn gwybod llawer o hanes Castell Penrhyn. Fe fyddwn yn rhoi’r manylion i chi fel rhan o’ch cynefino. Wrth i chi barhau i wirfoddoli yn y Penrhyn, byddwch yn casglu rhagor o wybodaeth, gan ddysgu am gefndir y teuluoedd a fu’n byw yma ac o ble daeth y cyfoeth.

Pa mor aml allaf i wirfoddoli?

Bydd unrhyw amser y gallwch chi ei roi fel gwirfoddolwr yn werthfawr, ac mae llawer o’n gwirfoddolwyr yma yn y Penrhyn yn defnyddio rota ar-lein i archebu’r amser y maent yn gallu ei roi ymlaen llaw, gan ein galluogi i gynllunio. Hyd yn oed os mai am gyfnod byr yr ydych yn gallu gwirfoddoli, fe fyddwn yn ceisio darparu ar eich cyfer a gallwn drefnu i chi weithio’n hyblyg ar draws nifer o adrannau gwahanol.

Waeth beth yw eich gallu neu eich diddordeb, fe fyddwn yn gwneud ein gorau i ddod o hyd i rôl wirfoddol sy’n addas i chi ac yn eich gwneud yn rhan o’r tîm yma yng Nghastell Penrhyn.

Teithio i’r castell ac oddi yno

Gallwn ad-dalu i chi am deithiau o’ch cartref i’r castell ac yn ôl bob tro y byddwch yn gwirfoddoli, gydag uchafswm o 40 milltir o radiws, os ydych yn teithio mewn car neu ar drafnidiaeth gyhoeddus.

Dysgwch ragor am wirfoddoli yng Nghastell Penrhyn

Os ydych wedi cael eich ysbrydoli ac awydd rhoi cynnig ar wirfoddoli, gallwch ddysgu rhagor trwy fynd i’r wefan swyddi gwirfoddol gwag a chwilio am Gastell Penrhyn a’r Ardd. Os byddai’n well gennych gael sgwrs ymlaen llaw i weld a fyddai gwirfoddoli yn addas i chi, ffoniwch ni yn y castell ar 01248 353084.